Zirlai pawl pahnihin MPSC siam\hat rawt

Zirlai pawl pahnihin MPSC siamthat rawt
MZP-in MPSC hotute leh office-a thawkte an dang a, hetih lai hian MSU-in chief minister hnenah MPSC siamthat dan tur rawtna an lo thlen ve bawk.
Mizoram Public Service Commission (MPSC) chungchangin nikum lam atang tawhin sawi a hlawh fo a, MZP leh MSU pawhin an lo aupui tawh thin a, social media lamah pawh MPSC chungchang hi sawi a awm fo.
MSU chuan tun hnai kum khat leh a chanve chhungin MPSC-in an tihsual siamthat (corrigendum) vawi 16 chuang an nei tawh tih an sawi.
MSU hian MPSC hnuaia hna lak dan chhuitu tur inquiry commission din an rawt a, an thil hmuhchhuah pawh mipui hriat tura puanzar an rawt.
MZP hruaitute chuan tun hnaia MPSC hnuaia hnalak diltute zingah tihdan dik lo tuartu mi sang an awm tlin an rin thu an sawi a, tuna an hriat theih chinah mi 670 an tling tawh tih an sawi bawk.
Hna pakhat laknaah pawh mi 200 vel chu an chhanna endik a ni lo tih an sawi a, hna lak dangah pawh court-a kal an awm thu leh court-in thiam a chantir thu an sawi bawk.
Zirlai pawl dang NSUI(Mz) pawhin MPSC chungchang hi an lo aupui tawh thin a, May ni 15-ah khan thuthar lakhawmtute kawmin MPSC tihdik loh an lo puang tawh.
MES (Mizoram Engineering Service) laknaah pawh electrical & electronic wing-ah mi pasarih lak turah pariat an tling tih te, thla thum chhunga hna lak lian tak pahnihah tihsual lian tak an nei ve ve tih an sawi bakah, kum khat leh thla li chhungin MPSC thuchhuah tihdikna (corrigendum) vawi 15 a awm tih te an sawi.
MZP chuan MPSC office kai turte dan chhunzawm zel an tum a, thuneitute nena inbiak a la awm lo tih an sawi bawk.