Zirlaibu dawn kim loh chhan zawt Minister insawifiahna fiah an ti lo

Sawrkar school tana zirlaibu chhut thin tun thlenga la dawng kim lo an awm chungchangah Congress Thalai chuan School Education minister hnenah a chhan an zawt a. A lo sawifiahna chu fiah an tih loh thu sawiin, a department hrechiang lo leh mawhphurna hlen zo loah an ngai tih an sawi.Congress Thalai hruaitute hian Ningani khan School Education minister Dr Vanlalthlana hi a office-ah an kalchilh a. Sawrkar school zirlaibu indaih lohnaah a rang thei anga hma la a, lehkhabu nei kim lote pe thuai tura ngenna an thehluh bakah zawhna zawh a ni.
Minister sawi danin, lehkhabu hi an chhut hmasak a zo tawh a, data an lakkhawm a kimchang tawk loh bakah state dang atanga raltlan rawn kal zingah heta Board Exam tih tum an awm nual avangin a tira an kep loh kha kep an ngai a, chhu nawn turin phalna lak hmasak ngai te a lo awm a, chhut nawn tura buaipui mek a ni.
Printing & Stationary department chuan Education department-in order a siam ang zat an chhu nia an sawi thu Congress Thalai hruaitute hian sawiin, hetih laia zirlaibu indaih lo awm hi Education minister-in a department chan a hneh loh zia leh zirlaite bakah sawrkar school a ngaihtuah lo tih a tichiangah an ngai a. Naupang leh school zat zirchiang hmasa loin lehkhabu an order tih a chian thu an sawi.
Education minister-in zirlaibu chhut dan chu sawrkar kal tawh tih dan nen a inang reng nia a sawi chuan a lakah beiseina thar, kalphung thar a awm loh zia a tichianga an ngaih thu te, Education minister hian a mawhphurhna a hlen loa, zirlaibu indaih chungchangah engmah insawifiah thei loa Printing & Stationary department leh SCERT hotute a insawifiah tir chuan a department chan a chian loh zia a lantir bakah department dangte nen an thawhhona a tha lo tih pawh a tarlan chian thu an sawi bawk.
“Education department hnuaiah hian ZPM sawrkar hnuah kumin kumtir lam khan zawhna leak-out a awm tawh bakah casual teacher lak chungchangah thil fel lo leh sawisep a tam a. Heng thil fel lo thleng fo hi Education minister hian a mawhah ngai lo niawm takin a tawngchhuak duh lo. Zirlaite harsatna tawh sukiang tura engtik lai pawha awm tura ngaih Education minister-in harsatna sutkian a nih theihna tura amah hmuh tum MZP hruaitute pawh naute birthday chhuanlama a hmu lote khan Mizoram zirna sawpchhiat vek a pawisak loh zia leh MZP hruaitute leh zirlaite zah lohnaah kan ngai a ni,” an ti.
Printing & Stationery minister Pu F Rodingliana’n MZP hruaitute hnenah zirlaite harsatna hrethiama zirlaibu chhut a nih nghal theih nan ama department sum atanga zirlaibu chhut nghal thuai a nih tur thu a lo sawi laiin, Education minister chuan zirlaibu daih lo chhutna man tur chief minister a sawipui tih a sawi leh lawi si tih Congress Thalai hian an sawi a. An thu a inhmuh loh bakah an thawhhona a chhe hleah an ngai tih an sawi a ni.

-- Advertisement --

8 Kumin July 15 atang khan Mizorama school hrang hrang chuan term exam hmasa ber an tan a. Hetah hian sawrkar school (primary & middle, govt. aided) zirlaibu la dawng kim lo school 1270 chuang an la awm.
8 Samagra hnuaia middle school leh primary school-a zirlaibu la dawng kim lo school 1270 (primary 581 leh middle 689) ah hian Aizawl district-a zirlaibu la dawn kim lohna school 309 (primary 173 leh middle 136) a awm.
8 Aizawl Municipal Corporation huamchhunga school an zirchiannaah zirlaibu dawng lo school 100 chuang an la awm a. Heng school-a lut tam tak chuan exam an neih tawh laia zirlaibu an la nei lo chu exam inbuatsaih dan harsa an ti hle a. School tam takah zirlaibu hlui dapchawpin zirtirna pek a ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More