Sawrkar sikula zirlaiten a thlawna zirlaibu an dawn thin chu tun thlengin an la dawng kim lo nia sawi a ni a. Mizo Zirlai Pawl chuan hemi chungchangah hian School Education minister sawipui an tum a, an hmu thei lo niin an sawi.
MZP Gen. Hqrs. thuchhuak chuan, Samagra Shiksha hnuaia zirlaiten zirlaibu an dawn thin, tun thlenga an la dawn loh chungchangah zirlaibu chhut lam buaipuitu Printing & Stationery department-a minister F Rodingliana chu Thawhtanni khan an hmu a; School Education minister erawh an hmu thei lo tih an sawi.
Printing & Stationery minister chuan zirlaite harsatna hrethiam in zirlaibu chhut a nih nghal theih nan a department sum atanga zirlaibu chhut nghal a nih tur thu a lo hrilh tih MZP hruaitute hian an sawi a. Zirlaite hmakhua ngaitu minister a awm chu thlamuanthlak an tih thu an sawi a ni.
‘A hun taka zirlaiten an zirlaibu an dawn theih nan hma lak nise, tia kan lo rel tawh, thla khat ral hnuah pawh zirlaiten an chanvo zirlaibu an la dawng kim thei lo hi hriatthiam har kan ti hle,’ MZP thuchhuak chuan a ti.
-- Advertisement --
Samagra Siksha hnuaia lehkhabu a thlawna sem tur la dawng kimlo sikul awm zat:
District PS UPS/MS Total
Aizawl 173 136 309
Mamit 130 106 236
Lawngtlai 122 84 206
Lunglei 164 164
Kolasib 30 58 88
Hnahthial 49 37 86
Champhai 28 34 62
Khawzawl 36 36
Serchhip 37 33 70
Siaha 12 1 13
Total 1270