Zirlaite hnenah fee pe let leh turin ti

Madhya Pradesh a Jabalpur district-a thuneitute chuan private school sawm te chu academic session pasarih zeta zirlai 81,000 chuang te laka tuition fee extra an chawitir Rs 65 crore chu zirlaite hnenah pe let leh turin a ti.
Heng shcool te hian dan kalhin tuition fee hi an tisang a ni, tiin Jabalpur District Education Officer (DEO) Ghanshyam Soni chuan a sawi.
Madhya Pradesh Niji Vidyalaya (Fees Tatha Sambandhit Vishayon Ka Viniyaman) Adhiniyam, 2017 hnuaia district-level committee din chuan heng school te hi zirchianna neiin zirlai te hnenah fee extra an la tih an finfiah a ni.
Dan kalha heng school tena zirlaite hnena kum 2018-19 atanga 2024-25 thlenga naupang 81,117 te hnena fee an lak tlingkhawm chu Rs 64.58 crore a ni an ti bawk a.
Soni chuan heng school te hnenah hian July 9 khan dan kalha zirlaite hnena extra fee an lak pe let tura tihna thupek an pek thu a sawi bawk.
May 27 khan Jabalpur district administration te chuan school functionary 11 te leh bookshop neitu thenkhatte lakah fee dan kalha tihsan leh textbook man tihsan avangin FIR an lo thehlut tawh a. Chumi kal zelah chuan school functionaries leh textbook shop owner ten dan kalha an chet dan chu hmuhchhuah belh zel a ni tiin District Collector Deepak Saxena chuan a sawi.
Dan ang chuan school in fee 10% aia sanga a tisang dawn a nih chuan district administration phalna lak hmasak ngai a ni a. Fee chu 15% chung lama tihsan a nih dawn phei chuan school chuan state sorkarin committee a din te phalna lak ngei ngai a ni bawk.
Heng school zinga thenkhatte chuan 10% chunglam fee tisangin a then te chuan thuneitute phalna la hauh lovin 15% ten an tisang bawk niin District Collector chuan a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More