Zirlaite nen Mizo tawng zir ho

Department of Mizo, Mizoram Christian College (MCC) leh Mizo Language Development Board tangdun chuan Nilain khan Mizo tawng zir hona an buatsaih.
MCC Mizo department head PC Lalngaihzuala chuan Mizo tawng tihhmasawn nana Mizo Language Development Board-in a thawhpui hmasa ber college an ni chu lawmawm a tih thu a sawi a. Mizo tawng humhalh leh chawikan kawngah theihtawp an chhuah zel tur thu a sawi. Principal Dr Tawnenga pawhin Mizo Language Development Board an thawhpui thei chu lawmawm a tih thu a sawi a ni.
Sawihawngtu, Mizo Language Development Board chairman R Lallianzuala chuan Board din a nih dan leh hmalak tawh dan sawiin, Mizo thu leh hla leh tawng tihhmasawn kawngah theihtawp an chhuah zel dawn tih a sawi a. MLB hmalakna chu politics thil a ni loa, hnam thil a ni, tiin, chutianga hma an lakna kawnga MCC an thawhpui thei chu lawmawm a tih thu a sawi.
Zirhonaah hian rawn pu ah Rozama Chawngthu leh MZU assistant professor Lalsangzuala te hman an ni a. Rozama Chawngthu hian “Mizo tawng kalphung” tih hmangin Mizo tawng chu thluk nei a nih dan, thumal tihdanglam dan, ri khat tawng a nihna in awmzia a neih dan, thu inkawp, a hnuhnung sawi hmasak chi leh tawng chungchanga thil pawimawh hrang hrang sawiin, tawng dang sengluh kara siamrem ngai awmte zirho turin a chhawpchhuak a ni.
Lalsangzuala hian zaizir leh ri thluk (phonetics & phonology), thumal inzawm dan, sentence inzawmkhawm dan, thumal leh sentence awmze sawina bakah Mizo tawnga hmansual theih hrang hrang sawiin, Mizo tawng grammar felfai taka siam a ngai tih a sawi.
Sawihonaah zirhonaa tel leh rawnpute hian thupui zirho leh Mizo tawnga hmalakna tur leh mi nawlpui huapa hmasawnna leh inzir ngaite sawi a ni.
MCC department hrang hrang 5th semester zirlaite bakah ICFAI University, Govt Johnson College leh Govt. T Romana College Mizo department zirlai leh zirtirtute an tel a ni.