Zirlaite scho’ tur rawn pePekchhuah thuai kan tum
- MSB secretary
Zirlaite scho’ tur rawn pe
Pekchhuah thuai kan tum
- MSB secretary
Sawrkar laipui Ministry of Tribal Affairs chuan Mizorama zirlaite tana post matric scholarship pek tur cheng 5000 chuang a rawn pe a. Mizoram Scholarship Board chuan a dawngtu turte hnenah a rang thei anga ber pek tumin bawhzui ngai an bawhzui mek tih an sawi.
Tun tuma Ministry of Tribal Affairs-in scholarship atana sum a rawn sanction hi kum 2023- 2024 a sem hmabak nuai 807.41 leh kum 2024- 2025 atan nuai 4235.40, a vaiin Rs. 50,42,81,000 a ni.
Thawhlehnia amah kawmtu MSU Gen. Hqrs hruaitute hnena Mizoram Scholarship Board (MSB) secretary Dr PL Ramliana sawi danin, sawrkar laipuiin centrally sponsored scheme fund atan digital payment system thar – SNA SPARSH hmang tura an tih thut avangin technical lamah harsatna tlem a awm rih a. A rang thei ang bera sum hi zirlaite hnena semchhuah tumin tan an la a ni.
Scholarship atana sum sanction a awm takah hian MZP Gen. Hqrs. leh MSU Gen. Hqrs chuan a hrang ve vea thuchhuah siamin, scholarship dawn tur central-in a pekchhuah lawk loh avanga Mizoram leh Delhi lama an bawhzui dan, chief minister leh larsap an pun bakah Lok Sabha MP Richard Vanlalhmangaiha’n a lo bawhzui dan an sawi a. Scholarship tur sum hmuh theihna atana theihtawp chhuahtute chungah zirlaite aiawhin lawmthu an sawi tih an sawi bakah semchhuah thuai a nih theihnan bawhzui rang turin thuneitute an ngen tih an sawi a ni.