Zirna in zahawmna tlahniam tawh chu vawnnun thar mek a ni tih School Education minister Lalchhandama Ralte chuan a sawi.
Government KVM High School Chhinga Veng chuan Thawhlehni khan an kum 50 tlin, Golden Jubilee an lawm a. He hun hmanpuitu School Education minister chuan school zahawmna tlahniam tawh tak chuan tunhnaiah ziaawm lam a pan nia sawiin, “Sawrkar bakah NGO, local council/ village council ten theihtawp an chhuahna zarah zirna in zahawmna hi vawnnun thar mek a ni a. Zirna in Mizo mipui zingah hmun lailum a luah leh tawh. Hei hi thawhhonna tha vang a ni,” a ti.
Mizoram hmalam hun chu zirnaah thui tak a innghat tih sawiin, harsatna tamtak karah sawrkarin theihtawp a chhuah zel tih a sawi a. National Education Policy 2020 chak zawka kalpui a nih bakah ‘quality education’ pawh kalpui mek a ni tih a sawi bawk.
KVM High School chu sawrkarin hostel a siamsak dawn tih Education minister hian a sawi a. Hostel enkawltu tur thawktu mi 7 pek an ni dawn tih a sawi a ni.
Bialtu MLA, minister Robert Romawia Royte pawhin bialtu a nihna angin KVM H/S mathematics zirtirtu chu MLA Fund atangin a laksak dawn tih a sawi a ni.
He schooll hi din a nih theiha’n H. Keuvunga te nupa in Rs. 10000 an pe a, an fapa hming chawiin Kapthangvunga Memorial School (KVM) hi 1973 March 30 a din a ni. Kum 2006- 2007 khan MP Fund atangin building thar sak niin, kum 2012 khan RMSA atanga sum hmuhin building sakbelh a ni a; kum 2013 khan NECS-in building dang an sak belh leh bawk. Kum 1991 khan provincialised niin, kum 1992 khan HSLC Examination Centre-ah dah a ni. Tunah hian zirtirtu 11 leh zirlai 73 an awm mek.
Zirna in zahawmna vawnnun thar mek a ni – Education minister
Get real time updates directly on you device, subscribe now.
Prev Post