Manipur-a buaina a reh a, remna leh muanna a awm theihna’n Mizoram Kohhran Hruaitute Committee chuan July 8 emaw 9 emaw hian kohhran tinte tawngtai rual hmang turin a ngen.
MKHC thuchhuak chuan kumin May 3 atanga Manipur state-a chi leh chi inkara buaina chhuak chu pawi a tiin, sakhua hmun hma, biak in leh kohhran bungrua (property) hrang hrangte inzah sak lo taka tihchhiat chu a dem a, thleng tawh lo se a duh tih a sawi.
‘He buaina avanga nunna chan tam tak an awm hi pawi kan ti takzet a, an chhung leh khatte kan tuarpui a ni. Remna leh muanna a lo awm leh thuaina turin rang tak leh chak taka hma la turin thuneitute, sawrkar laipui, state sawrkar leh pawl hrang hrang hruaitute kan ngen a ni,’ a ti.
Kohhran hrang hrangten mahni theih ang anga he buaina avanga in leh lo chan, ei leh bar tlachham leh himna zawnga raltlante an chhawmdawl chu lawmawm a tih thu MKHC hian sawiin, bansan mai loa kohhran hrang hrang leh tualchhung kohhrante mahni remchan dan leh theih ang tawka chhawmdawl hna thawk zel turin a ngen tih a sawi.
He buaina hi a lo reh a, remna leh muanna a awm a, hnam hrang hrang lungrual taka khawi hmunah pawh kan len za theihna turin mi zawng zawng Pathian hnenah tawngtaia dil turin a ngen tih MKHC hian sawiin, kohhran hrang hrang tualchhung kohhranten mahni remchan danin July 8 emaw 9 emaw hian tawngtaina hun hi hmang theuh turin a ngen tih a sawi a ni.
MKHC-in remna atan tawngtairual a rawt
Get real time updates directly on you device, subscribe now.