Zirtirtu dahngheh chungchanga sorkarin ngaihtuah mek

Zirtirtu dahngheh chungchanga sorkarin ngaihtuah mek
Education minister Lalchhandama Ralte chuan zirtirtu a nghet lova awmte dahngheh chungchang chu sorkarin a ngaihtuah mek tih a sawi.
Ningani khan education minister Lalchhandama Ralte-in Chanmari YMA Hall-ah Mizoram SSA Teachers’ Association (MSSTA) General Conference a hmanpui a, he hunah hian zirtirtu dahngheh chungchang hi sawiin, hun engemawchen atang tawh khan SSA hnuaia thawkte a theih ang anga a tahtawla dahngheh an nih theih nan sorkarin hma a lo la tawh tih a sawi.
Sorkarin recruitment thar a tih dawnin an tan reservation siamsak turte pawhin rawtna an lo siam tawh tih a sawi a, sorkar pawhin an dinhmun te hriatsakin a ngai pawimawh a, vawi duai lo an sawiho tawh tih a sawi.
Department hrang hrangah CSS hnuaia thawk tam tak an awm a, anni pawh hian dahngheh an duh ve vek a, sawrkar an nawr ve vek avangin DP&AR pawhin a zavaia khaikhawma zirchiang tur committee a din a ni a ti. He committee in rawtna a siam pawh cabinet meeting-ah ngaihtuah a nih tawh thu leh siamthat tul awma hriat a nih vanga uluk zawka en tha leh tura thawn let a nih thu a sawi bawk.
Gauhati High Court, Aizawl Bench-in zirtirtu dahngheh chungchanga thu a tihtluk chungchang a sawi a, court thutlukna hi sorkarin a dawn veleh dan angin Law & Judicial department hnenah zirchian tura pek a nih tur thu sawiin, chutihrualin anmahni lam pawhin uluk takin theihtawp chhuahin tan an la dawn tih a sawi. Hun engemaw chen atang tawh department-in hma a lo la reng tawh a, an tlanchhe dawn lo tih sawiin, MSSTA member te bakah Samagra Shiksha hnuaia thawk mi dangte pawh an ngaihtuah tel tih a sawi.