Zirtirtu zingah a tithei zawk puna insawn lo tura nawr thin an awm – Dr Vanlalthlana

Zirtirtu zingah a tithei zawk puna
insawn lo tura nawr thin an awm
– Dr Vanlalthlana
Aizawla zirtirtu inbeng nasa lutuk leh thingtlang lama zirtirtu indaih lohna siamrem tura hma an laknaah zirtirtu thenkhatin milian leh thiltithei zawkte pun a, insawn lo tura insawipui tir leh nawr an awm thin tih Education minister Dr Vanlalthlana chuan a sawi.
Nilainia Mizoram Hindi Training College (MHTC) in kum 50 tlin a lawm a hmanpuinaah Higher & Technical Education minister hian, thingtlang lamah zirna tih hmasawn a ngai nasa a, zirtirtu indaih lohna awm thin tihrem a nih theihnan sawrkarin hma a la tih a sawi.
“Aizawl khawpuia zirtirtu inbengberek nasa lutuk leh thingtlang lama zirtirtu indaih lohna siamrem tuma hmalaknaah zirtirtu thenkhat milian leh thil tithei zawkte pun a, insawn lo tura insawipui leh nawrna a awm thin a. Hetiang thil hi ti lo turin ka duh. Ram leh hnam tan a tha thei ang ber turin sawrkar chuan huaisen takin hma a la zel dawn a, mipui hriatthiamna leh tawiawmna ka ngen a ni,” a ti.
India ram zau zawk daidar tur leh eizawnna leh hna hrang hrang thawk a, state pawna chhuak thei turin Hindi thiam a pawimawh tih Dr Vanlalthlana hian a sawi a. MHTC zirtirtute chu awmze nei lehzuala Hindi zirna kalpui a, zirlaiten ziak leh chhiar mai ni lo, a tawnga tawng an thiam tak tak theihnan tan la turin a fuih.
Sawrkarin tunlai khawvel thiamna sang zawk hmanga Mizo tawng leh Hindi tawng, Mizo tawng leh Sap tawng lehlin zung zung theihna, artificial ontelligence, AI-Bhashini app a buatsaih mek tih sawiin, nakkum kum laihawl velah chuan a hman theih tawh an beisei tih sawiin, hei hi zirlaiten tangkai zawka an hman theihnan zirnaa senglut turin a chah a ni.
H&TE minister hian Hindi tawnga ziak lehkhabu 15000 chuang awmna leh tunlai thiamna hmanga thuam, New Age Learning Centre and Fully Automated Library a hawng nghal.
Mizoram Hindi Training College hi kum 1975-a Mizoram sawrkar leh Central Institute of Hindi Agra tangdun din a ni a. India hmarchhaka Hindi medium-a zirtirtu training-na hmun awmchhun niin, National Council for Teachers Education pawmpui a ni. Course pathum – Hindi ShikshaParangat (B.Ed); Hindi Shikshan Praveen (D.El.Ed) leh Hindi Shikshan Kaushal kalpuiin zirlai 100 vel an nei.