Chhiah kan pek hnem leh let leh tur a tam dawn tihna – Transport minister

Mipuiin chhiah kan pek hnem poh leh kan hnena let leh tur a tam tihna a ni tih minister Vanlalhlana chuan a sawi.
Thawhlehnia District Transport Office Khawzawl a hawnna leh Nilainia DTO Saitual a hawnnaah Transport minister Vanlalhlana hian, mipuiin chhiah kan pek chu kan hnenah a lo kir leh dawn a, chhiah kan pek hnem poh leh mipuia lo let tur a tam tihna a ni tih a sawi. Chuvangin mipuiin thuawih taka chhiah kan pek a pawimawh hle tih a sawi a ni.
Transport department chu revenue earning department tlemte zingah a tel ve tawh a, leiba ngah thin department ni tawh loin hma a sawn ve zel a, tunah chuan Mizoram sum bawma sum chhung tha ber pawl a lo ni ve ta tih a sawi.
“Kum kalta khan sawrkarin thawk chhuak tura min tuk zat, cheng vaibelchhe 60 chu tlemtein kan phak lo. Transport department hian tha taka hnathawh kan duh a, mipui thlawpna kan mamawh a ni. Lirtheia eizawng leh zin veivakten him zawka mipui rawng an bawl theihnan sawrkar thu ngaihchan leh thuawih kan zir zel a pawimawh a ni,” a ti.
DTO office thar chuan hmasawnna tam tak a kengtel tih minister hian sawiin, officer leh thawktu a ken tel bakah district chhunga lirthei register, driving license pek chhuah leh a dangte chak zawka kalpui a nih phah dawn a, dan leh thupek kenkawh kawngah nasa takin thawktute a pui dawn tih a sawi a ni.