Zirtirtute an inhre chiang em?

Teachers’ Day lo zik chhuah dan chu kan hre bel tawh. Teachers’ Day lawmnaah zirtirtu pawimawhna leh hlutna pawh kan sawiin kan inhrilh mawlh mawlh hlawm thin bawk; hei pawh kan hre bel tawh. Zirtirtute zawk hian an dinhmun, nihna, hlutna leh pawimawhna hi an lo hrechiang reng em? tih lam hi a pawimawh dawn hle.
Zirtirna kawngah, zirtirtute hi chi hnih, ‘zirtirtu tha’ leh ‘zirtirtu tha lo’ tiin a then hlawk theih a. Zirtirtu tha tehna quality hrang hrang neite chu ‘zirtirtu tha’ an ni a, a nei ve lote chu ‘zirtirtu tha lo’ an ni nghal mai a. Hemi piah lamah hian zirtirtu ‘sual’ a awm leh theih bawk awm e.
Zirtirtu tha ni tura quality hrang hrang zinga pawimawh tak pakhat chu a boruak azira mahni insiamrem zung zung theihna (adaptability) hi a ni awm e. Zirtirtute hian mihring ze inang lo tak tak, dinhmun inang lo tak tak leh, thiam thei em em leh thiam thei lo em em maite tum khatah an enkawl vek mai a, a harsat dan tur chu a hriat theih mai awm e. Hei vang hian zirtirtu chuan hriatthiamna te, dawhtheihnate, taimakna te, kawnghmang ngaihtuah chhuah thiamnate a neih a ngai a, chutiang nei tur chuan nasa taka a inbuatsaih a ngai a, a education qualification piah lamah qualification thar dang nei tura nasa taka tanlak a ngai. Ni tin school-ah hah taka naupang a zirtir hnuah, in lamah nasa taka a inbuatsaih zui a ngai a. A nihna takah chuan, zirtirtu tha ni tur chuan inchhungkhur leh pawn lam thila inhnamhnawihna hun hi a awm mang lo tluk a ni. Tun lai khawvel hmasawnna a than mil ang zela a in up date’ ve reng a lo ngai bawk nen, zirtirtu hna hi a namai lo hle a ni.
Zirtirtute Ni a lo thlen hian zirlaite leh nu leh paten chawimawina leh ngaihsanna thu an fah mawlh mawlhte hi zirtirtute hian anmahni theuhah ‘dawng tlak’ an ni em tih inenfiah nan hmang thin se. “Heti taka min chawimawi si chuan, an chawimawi leh fakna phu tur hian theihtawp ka chhuah ang” tia teachers’ day hi insiamtharna nia zirtirtute hian an hman thin phawt chuan, zirlaite quality pawh a sang ang a, chu chu ram leh hnam hmasawnna rahbi pawimawh tak a ni ngei ang.