Zirtirtute Ni hman dan tur rel

State Working Committee for Teachers’ Day 2024 chu an chairman, School Education minister Dr Vanlalthlana hoin Thawhtanni khan an thu a. Kumina Zirtirtute Ni hman dan tur leh zirtirtute hmakhua kaihhnawih pawimawh dan sawi a ni.
Kumina Zirtirtute Ni puala state pum huap leh district level-a hmalakna tur hrang hrang chhawpchhuah chu enho in pawm a ni a. Heng bakah hian National Foundation for Teachers Welfare (NFTW) Fund-a sum thawh zat leh he fund atanga zirtirtu damlo leh natna khirhkhan tuarte tanpuina pek chungchang, zirtirtu national leh state awardee lo ni tawhte chaiwmawi chungchang sawi ho a ni bawk.
School Education minister chuan zirna hmasawn zelna tura zirtirtute pawimawhna a sawi a. Zirna tihhmawsawn kawnga hnathawk kalkhawmte hnenah chuan state-ah zirna quality tha siam a nih nan theihtawp chhuah turin a sawm a ni.
School Education secretary David Lalthantluanga chuan Mizo zinga ram pum leh state pum huap zirtirtu tha chawimawina – National leh State Award dawngtute chawimawi nachang hriat pawimawh a tih thu a sawi a. School Education director Lalsangliana chuan Mizoramin zirtirtu chhuanawm leh tha tak tak nei mah se, National Award la thei tura hming thawh, recommendation lut a tam lo tih sawiin, hemi kawngah hian tan lak tul a tih thu a sawi.