February 1 atang khan Aizawl – Muallungthu inkarah City Bus service tir a ni a, tlan hmasa ber hi Aizawl City Bus Owners’ Association (ACBOA) office kawt, Ngaizel Kulikawn atangin Health minister Dr R. Lalthangliana chuan a vailiam. City bus service hian Zoram Medical College a paltlang dawn avangin he hmun pan damlo leh enkawltute bakah damlo kantute tan tangkai tura beisei a ni.
-- Advertisement --
Minister chuan ZMC pan ngai damlo leh damlo awmpuitute bakah damlo kantute zinga a tam zawk tan taxi hman a hautak deuh thin avangin, chuan man tlawm zawk City Bus service awm thei se, tiin duhthu an sam thin tih a sawi a. Tunah a a hlawhtling ta chu a mamawhtute phurrit a chhawk zangkhai ngei a beisei tih a sawi. Hemi atana Transport minister Pu TJ Lalnuntluanga’n a awlsam zawnga hma a lo laksak avangte, Transport hotute leh ACBOA ten theihtawp an chhuahpuinaah te lawmthu sawiin, bus service-in a paltlang tur veng leh khuaa local council leh village council hotute chungah lawmthu a sawi a ni.
“Civil Hospital Aizawlah khum dah belh a harsat tawh avangin ZMC lamah damlo in admit a ngai thin a, ZMC-ah hian khum 500 a awm bakah cabin engemawzat siam mek a ni a, reiloteah zawhfel kan inbeisei. City bus service hian heng chhawr tangkai kawngah hian kawngro a su ngei ang,” a ti.
ACBOA president PC Zoliansanga chuan bus tlan hun an ruahman chu a tul anga ennawna tihdanglam leh theih a ni tih a sawi.
City bus hi nitin Ngaizel – Muallungthu inkarah vawi 8 a tlan tawn dawn a, bus hmasa ber hi zing dar 6.20 ah Ngaizel atangin a chhuak a, a dang zawng hi Bawngkawn atangin a chhuak ang.