ZNP lam mi thiam takin an suihte – MNYF president

ZNP lam mi thiam takin an suihte
– MNYF president
ZPM-a inchhunglut zinga member ngah ber ZNP lam mite chu tunhnaiah thiam taka suihtet mek an ni tih MNF Thalai president Dr L Thangmawia chuan a sawi.
MNF Lengteng North Block (chuan hnuai) Political Training, Chiahpui khuaa neih a hmanpuinaah Lengteng bialtu MLA Dr L Thangmawia chuan ZPM-in Mizo nationalism chawisan lam an hawia a lan loh thu te, mi tlinlohna zawnkhawm leh issue based-a politics thiam taka kalpui bak an hnen atang hian danglamna hmuh tur ala awm rih loh thu te, kalphung thar an zawrh chu tuna an kal mek dan a nih phei chuan principle nei lo, nikum lawka an duhloh kha kuminah phur taka kalpui leh thei mai zel, lalna leh thuneihna chan ngawr ngawr ngaihtuaha Mizo mipui vehthlem mektu an nih thu a sawi.
ZPM zinga member ngah ber ZNP chu tunhnaiah thiam taka suihtetin an awm mek tih sawiin, “Hnam hmangaih (nationalist) avanga kum 20 chuang ZNP-a lo awm tawhte leh Mizo thalai hnam vei zawng zawngte, Mizoram leh hnam tana kum 60 chuang Pathian hruainaa nghet taka ding mek, Mizo hnam inpui MNF-ah lawilut turin ka sawm a ni,” a ti.
MNF chuan nasa taka beih a tawk mek a, chu chu an inenfiahna tura Pathianin rem a ruatsak a ni tih MNF Thalai president hian a sawi. “Kan tih diklohte thupha chawi a, kan ram leh hnam tana tha zawka kan thawh theihnana kan rilru tuaithar nan hmang ang u,” a ti.