Zo hnahthlakte leh Meitei inbeih kum khat tling ta

May ni 3 kha Manipur-a Zo hnahthlakte leh Meitei inbeih kum khat tlin champhaphak a ni a, Manipur-a Zo hnahthlakte’n hemi ni-ah hian hun an hmang.
May ni 3, 2023-ah khan Zo hnahthlakte leh Meitei kar a alh thut a, silai leh ralthuam thlengin an hmang zui. Chi leh chi an indo a, an indona hi ram inchuh vang a ni ber.
Zo hnahthlak lamin an chhinchhiah danin, kum khat chhung hian Zo hnahthlak lamah mi 185-in nunna an chan a, Zo hnahthlak khaw 200 chuang hal niin, in 7000 a kang. Biak in leh sakhaw hmun 360 chuang tihchhiat a ni a, mi 41,425 an tlanchhia.
Manipur-ah hian Zo hnahthlakte ram, Churachandpur, Kangpokpi, Chandel leh Tegnopal district-ahte hun an hmang.
Churachandpur district-ah chuan zing karah biak in hrang hrangah mipui an tawngtai a, Martarte thlanmualah hun an hmang bawk. Chawhnu lamah Peace Ground-a Wall of Remembrance-ah mipui huapin hun an hmang leh a, zaithiam hrang hrangin ‘Ro min relsak ang che’ tih hla an sa a ni.
Manipur-a Zo hnahthlakte hian Kuki-Zo Awakening Day tiin hun an hmang a, New Delhi lamah pawh he ni hi hmang an awm.
Zo hnahthlakte leh Meitei inkar buaina hi hun engemaw chen a inmun hnuah nikum April thla tawpah khan a irhchhuak a, April ni 28, 2023-ah khan Lamka khawpuiah buaina a chhuak a ni.
April ni 28 khan Churachandpur-ah Manipur chief minister Biren Singh-a’n open gym hawn a tum a, forest reserve area leh SC leh ST chungchanga Biren Singh-a sorkar laka lungawi lo Zo hnahthlakte’n hei hi an duh loh avangin chief minister pawh hian a \hulh a ni. Open gym hawnna hun hi an hmang ta tho a, mipui tel tur an awm lo ang tih hlauvin sorkarin sorkar hnathawkte a kal luihtir a, hemi \um hian mipui leh venhim hnathawkte an intibuai a ni.
May ni 3 khan Manipur sorkar laka an lungawi lohna lantirin All Tribal Students’ Union, Manipur te’n district tinah kawng an zawh a, ralmuanga kawng an zawh hnuah thil duhawm lo a thleng ta a ni.
Thu dawn danin, kawng an zawh hnu, mipui an la \in fel hmain Churachandpur daia Anglo Kuki War Gate chu Meitei nia hriatte’n an hal a, a chhehvelah chi leh chi inkarah buaina a chhuah nghal bakah hmun dang a kangkai ta a ni. Chuta \ang chuan buai tak takin an buai ta a, ralthuam an lek ta hial a ni.