Zo hnahthlakte leh Meitei la inep zel

Manipur-ah Zo hnahthlakte leh Meitei an la inep a, Thawh\anni pawh khan silai a la puak. Thawh\anni lamah hian an boruak chu a dai deuh a, mahse silai chu a la puak tih thu dawn a ni.
Imphal atanga tlang ram lam luhna, Churachandpur luhna kawng velah Inrinni atang khan an inep a, silai pawh a puak nasa. Thi leh hliam pawh an awm. Churachandpur atanga thu dawn danin, thi leh hliam zat hi hriat hleih theih a ni lo a, Churachandpur District Hospital an thlenpui chinah Thawhtanni tlai lam thleng khan Zo hnahthlak lamah hliam tuar hi mi 11 an awm a, mi pahnihin nunna an chan. Meitei lam dinhmun hriat a har a, Sugnu lama an inkahnaah Meitei hi a bet zawkah an tang tih an sawi.
Imphal atanga khawchhak lam atanga Churachandpur luhna Sugnu khua leh a chhehvelah Inrinni atang khan an inep a, a zan atangin an inkap. Chumi hnuah Imphal atanga hmar lam atanga Churachandpur luhna Kangvai khua leh a chhehvelah an inep leh a, silai a puak bawk.
Meitei lam hian Churachandpur hi lak an duh a, chumi tur chuan Meitei lam hi an inchhek a ni tih chu Zo hnahthlakte thlir dan a ni a, chumi laka inven nan chuan Sugnu leh Kangvai velah hian an inchhek a ni.
Sugnu hi Meitei awmna a ni a, Zo hnahthlakte hian hual betin inring rengin an awm a, Inrinni zan atang khan Meitei nen hian an inkap a ni. Kangvai leh a chhehvel khuate’n Meitei-in an pal tlang thei ang tih hlauvin khua an veng bawk a, anni lam pawh hi an inkap. Mahse Thawhtanni kha chuan Sugnu lam leh Kangvai lam hi an boruak a dai deuh a, silai erawh a la puak tih thu dawn a ni.
Manipur-a Zo hnahthlakte hian an buai tirh atangin mahni ram ven hna an thawk a, ‘volunteer’ tiin an sawi mai a, mahni ram veng turin mipa an inpe a ni. Meitei lam hi Meitei pawl lian leh chak Arambai Tenggol hmingin an kal a, mahse Zo hnahthlakte chuan he pawl member-te chauh ni lovin he pawl hming hian Manipur Police an che tih a chiang an ti.
‘Ralthuam an nei tha a, lirthei an nei tha a, commando an awm a, sniper an awm a, an silai mu pawh a tha a, two-inch mortar thlengin an nei a, bullet proof pawh an nei a, sorkar an tel tih a chiang,’ tiin Zo hnahthlak hruaitu pakhat chuan The Aizawl Post a hrilh.
‘Biren-a (Manipur chief minister) pawhin Zo hnahthlakte leh Meitei inbeihna tiin a sawi duh lo a, tribal-in sorkar an bei tiin a sawi a, chu chuan thil awmzia a tarlang chiang viau a ni,’ a ti bawk.