Zo hnahthlakte vote tla tha lo

Lok Sabha inthlanpuiah Manipur-a Zo hnahthlakte vote a tla tha lo a, an vote erawh a hlawm turah an ngai.
Nikum lam atangin Manipur-ah hian Zo hnahthlakte leh Meitei an indo a, hetiang kara inthlanah hian Zo hnahthlakte hian vote thlak an phur loh bakah, candidate pawh an awm lo.
Manipur-ah hian seat hnih a awm a, Zo hnahthlak te, Naga te, Meitei lei hnam dang awmna outer Manipur-ah candidate pali- Naga People’s Front (NPF) leh Congress candidate leh independent ticket-a ding pahnih an awm. NPF hi Manipur-a sorkarna siamtu BJP-in an thlawp a ni.
Churachandpur district-ah chuan Zo hnahthlak pawl hrang hrangin an mite chu vote thlak turin an ngen a, Congress candidate vote turin an ngen bawk.
Meitei nena an inbeihnaah hian Manipur sorkar chu Meitei lamtangah an ngai a, Manipur sorkar hi anmahni beitu-ah hial an ngai. Hei vang hian sorkarna siamtu party hi vote loh ni se an ti a ni. A tirah chuan inthlan hi boycott ni se tih ngaihdan te a awm a, boycott lova NOTA vote vek ni se tih ngaihdan te pawh a awm.
Churachandpur MLA bialah chuan voter 64890 an awm a, hriat theih chinah an zinga 41201 te’n vote an thlak. Vote hi 63.49% a tla a ni.
An hruaitute chuan Congress candidate vote tura an ngenna hi zaah za chu a hlawhtlin an ring lo a, mahse 80% vel chuan Congress candidate an vote ang tih an rin thu an sawi.
Kangpokpi lamah vote tur an inhrilh chiah lo a, mahse BJP lamtang an vote lo turah ngaih a ni. Kangpokpi-a Zo hnahthlakte vote tla zat hi hriat a ni rih lo a, vote a tla tha lo tih thu dawn a ni. Chandel leh Tegnoupal district-ah pawh Zo hnahthlakte’n BJP lo lam an vote tlangpui tih thu dawn a ni a, Zo hnahthlakte vote tla zat hi hriat a ni rih lo.