‘Zofate Jerusalem’ tak takah Mizoram hi siam a ngai tawh – Vanlalhmuaka

Mizoram chu ‘Zofate Jerusalem’ ti thin mah ila, hmundanga Zofate harsatna tawk an rawn tlankhawm pawhin central-a kut dawh zel a ngai a, chutiang ngai lo tura buatsaih chu BJP chuan a tum tih an state president Vanlalhmuaka chuan a sawi.
Thawhtannia an party office-a inkhawmah BJP Mizoram president Vanlalhmuaka chuan, Mizoram chu Zofate Jerusalem ti thin mah ila, tun dinhmunah chuan Mizote Jerusalem-ah tam a tla tih a sawi. “Kan unau ramdanga awmten harsatna an tawh changa lo tlan khawm an awm pawhin, central-ah kut dawh a ngai nghal thin. Chutiang ni loa, Mizoram hi Zofate Jerusalem tak tak atana buatsaih hi BJP Mizoram chuan kan tum a ni,” a ti.
Mizoram kan intodelh hunah chuan kan unaute lo mikhual a, duat taka lo enkawl thei turin Pathianin min buatsaih dawn, tih chu a rin dan a ni tih sawiin, “Mizoram hian tawngka chauha hmangaihtu a nei tam ta a, a taka hmangaiha mahni kea ding thei tur buatsaihtu tak tak erawh a la neih loh avangin, vawiinah pawh heti zawng hi kan thlen chin a ni,” a ti.
BJP chuan ‘Mizoram First’ an tih angin, Mizoram intodelhna tura an hmachhawp leh manifesto tihpuitlin chu an tum ber a ni a, heng an hmalakna atana hmachhawp an neih atang hian Mizoram intodelhna kawng a inhawng lian hle tih BJP Mizoram hruaitu hian a sawi a. State dangte hmasawnna kan hmuh fo ang chu kan kawtkai ngeia kan hmuh ve hun hi a nghahhlelhawm tih a sawi a ni.