ZOFATEN ENGE KAN MAMAWH HMASAK BER?

Rev. Dr. Zaichhawna Hlawndo

Zofate chauh kan ni lo, khawvel puma mihringte hian mamawh kan nei. Chu kan mamawh hmasak ber chu enge? tiin inzawt ta ila kan chhan dan a inang lo maithei. A tam berte chuan sum/pawisa hi kan mawmawh hmsak ber chu a ni an ti ang. |henkhat chuan eitur chaw kan mamawh hmasa ber kan ti bawk ang. A then chuan chaw aiin boruak hip tur kan mamawh alawm pawh an ti thei. |henkhatte chuan tui tel lovin kan nung thei lo, chuvang chuan tui kan mamawh hmasa ber an ti mai thei bawk. Mi tam tak chuan mihringte chuan kan chenna tur in kan mamawh hmasa ber tite pawh kan awm awm e.
Khawvel ram pum politics hi mipuite mamawh tur tha inzawrh siakna a ni kan ti thei awm e. Party hrang hranga roreltute leh politician te pawh hian ram mipuite mamawh pek tur an zuar thin a. A tha thei ang ber leh mipui mamawh ber leh an duh ber tur pek tur an zawng thin. Mipui mamawh pek tur zawrh tur nei thatah nasa takin an inel a, chumi hmang chuan mipuite hmaah an inzuar a, mipuite rilru hneh turin nasa takin an bei thin. Mipuite pawhin an mamawh pe theitu tur ni a an hriatte chu an vote thin. Ram leh hnam mamawh emaw thatpui tur lam aiin mimal leh chhungkaw tana hlawkna leh an mamawh phuhruk thei turte an dah pawimawh hmasa thin.
Zofaten party politics system kan lo hmelhriat chinah pawh hian khawvel ram dangte tih dan ang bawkin ram leh hnamin a mamawh te kan politician-te pawhin an lo zuar tawh thin. Kan ram hruaitu Pu |henphunga Sailo chuan mihringin khawsak nana kan mamawh paruk- Kawlphetha, Veivahna, Tui in tur, Buh, Inkalpawhna leh Thingtlang hmasawnna a ngaipawimawh a. Pu Zoramthanga leh Pu Lal Thanhawla te chuan mipuiin eizawnna bul tanna turin sum kan mawmawh tiin nuai khat/nuai thum sem policy hmangin NLUP leh SEDP hmanga in tunnun a ngai tiin kum engemaw zah min kalpui a. Tuna ZPM chuan ‘kal phung thar’ bana kaih policy hi kan ramin a mamawh tiin hma an la mek bawk. Kan politician ten mipuite mamawh an zawrh te, an beisei anga kan kal chuan hlawhtlinna nei ngei ngei tura min zirtirna chu a taka a thlen leh thlen loh hrechiangtu chu mipuite kan ni.
Chhungkaw mamawh hmasa ber chu sum ngah hi a ni tiin, sum leh paiah nasa takin kan intlansiak a. A mawi leh mawi lo, a dik leh dik lo pawh ngaihtuah lovin sum kan hmuh theihna tur a nih chuan tiin a bawhin kan bawh huam huam a. Sum ngah tak tak pawh kan tam ta khawp mai. Mahse sum ngah chu damna ber a lo nih lohzia te, chhungkaw chhiatna bul a lo nih zawkzia te, kan nunna atan pawh damna aiin thihna tur hlauhawm tak a lo nih dan chu a hmutu, a hretu leh a taka tawngtu kan tam ta hle. Bible-in sual tinreng bul a tih, ‘Tangka sum ngainatna’ ah kan hriat loh hlanin kan lo tlu lut a, kan duh êm êm kan damna tur emaw kan tih kha min eichhetu a lo ni tih chu a takin kan lo hmelhriat ve ta chu a nih hi.
Ei leh bara intodelh hi kan mamawh hmasa ber alawm ti a, taima tak taka hnathawk, hlawhtlin tum tam tak beidawng tak tak kan va tam em! In leh lo tha hi kan mamawh ber chu a ni ti a, mawi leh mawi lo, dik leh dik lo pawh sawi lova in tha tak tak sa, fate tana rochun tura tana siam, a luahtu an fate nunin tlin leh si lo kan va tam em! Politics khelh fuh hi a pawimawh ber mai ti a, lal leh thuneihna channa tur a nih phawt chuan tia mi hlawhtling nia kan ngaih, din hmun tha tak tak lo chelh ta, mahse chhungkaw keh chhe si kan va tam em!
Kan ram leh hnam a tlu chhe mêk a, khawtlang nun leh chhungkaw nun a rum mêk a. Natna tihdam theih loh chi hrang hrangin kan ram a tuam mêk. Thihna rapthlak tak tak chu ni tinin a thleng tih mai tur a ni. Kan thlai chin a tam a, kan ran vulh te an pûl a. Eirûkna leh hlemhletna luipuiin min chimpil mek a ni ber mai. Lal leh thuneih inchuhna te, elrel leh itsikna te, a chhe thei ang bera insawichhiatna chuan social media khawvel chu a luah khat a ni ber mai. Heti tak mai dinhmunah hian eng vanga lo ding ta nge kan nih? Khawnge kan politician-te sawi damna, hlawhtlinna leh thlamuanna chu? Hetiang hian em ni kan kal zel dawn?
Eng nge Zofate mamawh hmasak ber chu ni ta ang le? Eng nge kan nunna atana pawimawh ta ber chu ni ang? A chhanna chu Bible-ah chiang takin kan hmu- Kan Lalpa Isua Krista khan ei leh in lam te ngaihtuah hmasa a, lungkham lo turin min lo chah vek tawh. A lal ram leh a felna kan zawn hmasak chuan kan mamawh zawng zawng hi kan nei vek dawn a lo ni (Matthaia 6:33). Chuvang chuan Zofa Kristian te hian kan nihna ang takin Lal Isua Krista hi kan Pathian, kan lal engkima kan chunga roreltu a ni tih hi kan hriat chian a ngai. Chu ngei chu a taka a lo thlen dawn avangin kan ram dung leh vangah indona chu lalpa indona a ni a, hnehna chu Lalpa ta a ni tiin kan lo au deuh vek tawh. Kan chhungkua, khawtlang, kohhran leh mimal nunah Lal Isua Krista Lal ber rawhse ti a au hla chham lo pawh kan awm tawh mang lovang. A thu a kan au hi a takin a lo thleng thuai dawn a, kan ramah hian Party Sawrkar ni lo PLRS = Pathian Lal Ram Sawrkar a ding dawn. Ram thianghlim, Hnam thianghlim, Rorelna thianghlim din turin rilru thianghlim i pu vek ang u. Amah Pu Rokungan “Kan ram kan hnam min hruaian nang chauh kan thlang a che” ti thei turin inbuatsaih ang u.