Zofaten tawng intawm neih a tul – Chief minister

Mahni tawng bil kalsan chuang loin, kan zavaia kan inhriattawnna tur Zofaten tawng intawm kan neih a, kan chawilar thiam a tul tih chief minister Lalduhoma chuan a ti.
Thawhtannia Chapchar Kut 2024 Organising Committee buatsaih Chapchar Kut 2024 Post Souvenir a tlangzarhnaah he Committee chairman ni bawk chief minister chuan, tawng chu hnam min phuar khawmtu a ni thei a, min tidarhtu pawh a ni thei, tiin, “Zofate hian mahni tawng theuh kalsan chuang loa kan zaa kan inhriattawnna tur tawng pakhat kan chawilar thiam a tul a, common language tha tak pakhat kan neih tel a tul,” a ti.
Thil a inthlakthleng zel a, chu chu kan thatpui nge kan chhiatpui tih hriatthiam a har tih Lalduhoma hian a sawi. “Rei vak lo server down te hi kan buai phah em em tawh a, mahse internet hmang ve lo, changkang loa kan hmuhte tan erawh buai phahna a awm lem lo. International ramri, state ramri, hnam hming (nomenclature) thlengin a danglam fo mai. Zofate inrelbawlna pawh a la danglam zel loang tih kan sawi thei lo. A tha zawnga danglam tir tumin ngaihtuahna kan seng a, hmathlir zau leh huapzo tak kan nei,” a ti.
Chapchar Kut kan kalpui dan pawh kan inunauna titha zawnga huapzo taka kalpui thiam a ngai, tiin, hmanraw tangkai taka hman chuan, nasa lehzualin min phuarkhawm dawn tih a sawi a ni.
Kumin Chapchar Kut thupui kha ‘Zo nun ze mawi – tlawmngaihna’ a nih angin hemi lam hawi thupui hrang hrang Mizo tawnga ziak 13 leh Sap tawnga ziak 4, thlalak leh report a awm a, phek 180 a chhah a ni.