Zokhawtharah kawng khar leh dawn

April thla chawhnu lamah a chhan hriat tur mumal awm lovin India sorkarin Zokhawthar bula Mizoram leh Myanmar inkalpawhna gate a lo khar tawh a, Ningani pawh hian an khar leh dawn.
Tun tum hi chu an khar chhan hriat a ni a, CBI-in ramri-a insumdawn tawnna an tlawh dawn vangin hemi ni hian bungrua engmah kaltlangpui loh tur an ti a ni.
July ni 23 khan Zokhawthar VC te’n Champhai-a customs hotute hnen atangi thu an dawng a, ram pahnih inkalpawhna hi July ni 25-ah CBI-in an tlawh dawn a, chuvangin kawng an khar dawn tih an hriattir.
Zokhawthar VC president Lalmuanpuia chuan custom hotute hian phone hmangin an hrilh a, kawng khar hun hi ni 25 tia an hrilh thu, ni 25 hnuah an khar zui dawn em tih an hriat bik loh thu te a sawi.
CBI hi Mizoramah office neiin an awm sa a, inspector-in a ho. Tun hnaiah Delhi atangin CBI hotute Mizoramah an rawn kal nual tih thu dawn a ni.
Myanmar lama Run lui lei a chhiat hnuah ramri-a insumdawn tawnna hi a lian tak tak tawh lo a, Myanmar-ah sorkar an mumal loh avangin lei siamtha tur pawh an awm lo. Myanmar atangin Zokhawtharah bungrua a lut tam tawh lo a, sumdawngte leh an hnena hnathawkte pawhin an tuar mek.
Zokhawthar VC president chuan an khuain an tuar tih a sawi a, bungrua a lut tlem a ni ringawt lo a, chhungkaw eizawnna a nghawng tih a sawi. Lei chhiat hnuah he sumdawnnaa hnathawk hi ni khatah mi 200 vel chu an la awm thin thu a sawi a, kawng hi ni khat chauh an khar a nih chuan a nghawng vak lo turah an ngaih thu a sawi.