Zoram Harhna kum 120-na lawm

Zoram Harhna kum 120-na lawm
Zoram Thar Zofate Lairelna Inpui chuan Inrinni khan Zoram Harhna kum 120-na an lawm a. Zoram Thar hruaitu Rev. Dr. Zaichhawna Hlawndo chuan a lehkhabu ziah “Harhna Hmasa Ber Pawchhuaktute Chanchin” tih chu a tlangzarh.
Zoram Harhna champha pual hian April 4 chawhma dar 10.30 khan Mizoram Bethel Lungphun, Chaltlangah hun an hmang a. Mizoram Bethel lung phun a nih dan Nunnathingparlawma’n a sawi a. Lalpan Zofate Thlarau Thianghlim hriak a thih avanga lawmthu sawina leh Mizoramah Thlarau Thianghlim hnathawh ropui tak a lo thlen zel a, mei mit loa a mite a tlen fai zelna turin tawngtairual a ni. Zosanglianin a nu leh pa Thangzika Chawngthu leh Vanlalthawmi te chanchin leh Bethel Lungphunna tur ram an pek thu a sawi.
Chawhnu lamah Zoram Thar Zawlbukah hun hman chhunzawmin, Pathian faka zai leh lamin hun an hmang a. Kum 1906-a Mairang Assembly chhima Zoram Harhna pawchhuaktu mi 10 chanchin chhiar chhuah niin, an chhungte lokal hnenah hriatrenga leh chawimawina hlan a ni. Thangzika Chawngthu-te nupain Bethel Lungphunna tur ram an pek hriatrengna leh chawimawina chu an fanu Zosangliani hnenah hlan a ni bawk.
Zoram Thar hruaitu Rev. Dr. Zaichhawna Hlawndo in a lehkhabu ziah – Harhna Hmasa Ber Pawchhuaktute Chanchin tih chu a tlangzarh a. Sermon thupui “Kha Bethel Pathian kha ka ni” tih hmangin a sawi. Mizoram Bethel lungphun chu Zofate chenna ram thar tura a lo ruatsa diam leh hnam anga a din thar lehna tur hmun a ni tih a entir tih sawiin, “Lalpan hnambote chanchintha hmangin min rawn zawng chhuak a, Thlarau Thianghlimin a leilung pawh hriak a rawn thihna hmun a ni,” a ti.
Harhna pawchhuak tura kal mi 10 hian Israel hnam 10, Pathian thuthlung bawhchhetute ai an awh tih a sawi a. Chu’ng hnam 10 chu hun hnuhnungah a din thar leh dawn niin a sawi a ni.