Zoramah Hualngoram
|iau chhakah Hualngoram a awm a, Myanmar rama Chin state huam chhunga mi a ni han tih hian Mizoram state leh hmun danga Zofate tan a lang foreign thei mai thei; mahse Rihdil awmna a ni a, Zo hnahthlakte thlahtute ram a ni.
Rihdil a awm a, Buannel awmna pawh a ni. Lalmanga nu te khua a ni a, ‘Lalmanga nu hlawh/lawm rawih ni’ tih tawngkam lo chhuahna niin, Hualngoram lam hi chuan ‘Lalmanga nu hlawh rawih ni’ tiin an sawi. Hla phuahtu hmasa Pi Hmuaki thlan leh Liandova te unauin saphai an hmuhna te a awm a, Farzual luahtu lalvunga tuallenna hmun pawh a ni.
Muchhip tlang pawh Hualngoramah hian a awm a, hei hi Lusei sakhaw lo chhuahnaah ngaih a ni. Pi leh pu thlangtlate’n an thlangtlak kawnga khawpui lian an din, Zofate chanchina khaw pawimawh pakhat Seipui awmna a ni bawk.
Champhai district dep |iau chhakah Hualngoram tia sawi hi a awm a, Myanmar sipai sorkar kut atanga latu Hualngoram People’s Orgisation (HPO) te’n an awp mek.
Khaw 58 a awm a, Zokhawthar bula Khawmawi hi HPO-in an awp hnua an khawpui a ni. HPO hian chhiarpui an nei a, chuta a lan dan chuan mihring Hualngoram pumah 30000 vel an awm.
“Pi leh pute atanga kan hmun pawimawhte hi kan humhalh tha a, hemi kawngah hian theihtawp kan chhuah,” HPO vice president C Liankunga chuan a ti.
HPO hian president, senior vice president leh vice president pahnih an nei a, anni hi an hotu lawkte an ni.
Sipai an nei a, police pawh an nei. An “sorkar” dinah hian department 10 chuang an nei a, health department te, labor & employment department te, education department te, 10 chuang an nei. Heng hi secretary-in an enkawl a, secretary chungah chuan HPO office bearer-te an awm a ni.
Zirna an ngai pawimawh a, zirtirtu 157 vel an awm mek. Primary school atanga college thlengin zirna in 12 vel an nei a, nursing school pawh an nei.
“Mipui kan tangrual a, mipuite’n kan thu an ngai pawimawh thiam a, kan lawm khawp mai. Kan sorkar hi mi sorkar anga chak leh sum ngah kan ni lo mai thei a, mahse kan phak ang tawkin hna kan thawk ve a, kawng te pawh kan siam ve a ni,” C Liankunga chuan a ti.
HPO hian 2023 November ni 13-ah Hualngoram hi sipai sorkar kut atangin an la a, November ni 11-13 chhung an inkah hnuah an la a ni.
Sipai sorkar hian tun hnaiah an ram chante lak let tumin theihtawp an chhuah a, Hualngoram pawh hi lak let an tum hmasak zingah a telah an ngaih avangin May thla chhung khan mi sang chuang chu Mizoramah an raltlan a ni.