Zorimawi arsi lian Vanhlupuii a her liam ta

Zorimawi arsi lian Vanhlupuii a her liam ta
Mizo rimawi khawvela hming dai tawh lo tur, Mizo zaithiam zinga All India Radio-a top grade artist awm chhun, Mizo hmeichhe zinga Bachelor of Commerce (B.Com) hmasa ber ni bawk, Vanhlupuii, kum 77, chu March ni 30, 2024 zing dar 2-ah stroke avangin Ebenezer Hospital-aha thi a, hemi ni vek chawhnu dar 2-ah Dawrpui Multipurpose Hall, Pipu Tlang, Dawrpuiah vui a ni. Vanhlupuii hian a fanu Vanzaipuii te nupa leh a tu paruk te a kalsan a ni.
Vanhlupuii hi a chauh deuh thut avangin February ni 22, 2024 khan Ebenezer Hospital-ah luhpui a ni a, that lam a pan dawn emaw tih laiin March ni 26, 2024-ah a chau leh thut a, stroke a nei tih hriatchhuah a ni a, March ni 29-ah ICU-ah dah niin, ventilator nena tangkawpin enkawl a ni a, March ni 30, 2024 zing dar 2-ah a boral ta a ni.
Rimawi lama mi hmasa Vankhama fate zinga mi niin, a naupan lai atangin a pain rimawi lamah a kaihruai nasa hle a, hmeichhe naupang kum 5 mi lek a nih laiin United Mizo Freedom Organisation (UMFO) ‘Day’ lawmnaah a zai a, hei hi mipui hmaa a zaina hmasa ber niin, heta tang hian mipui hmaah a zai ta fo a, sap leh mizo hla sain, Theatre Hall-ah pawh a zai hmasa pawla sawi a ni. A pa, Vankhama hla pawh a sa tam hle a, radio-ah hla 200 vel a khung a, Mizo zaimiah radio-a hla khung tam ber te zinga mi a ni ngei ang.
A zai dan a danglam a, mahni style nei niin, a zai ngaihthlak a hahdamin, mi a awi dap dap thin a, audio album pathum ‘|halai Huaisen’ (1984), ‘I Hun Tithianghlim La’ (1985) leh ‘Vankhama Hlate’(1991) a siam a, lengzem hla a sak zingah ‘Fam khua ka chanpui awm e,’ tih leh ‘Damlai Thlan Thim’ tihte pawh a lar hle a, Pathian fakna hla lamah chuan “I hnenah lawmthu kan sawi e,’ tih e, ‘Siamtu Remruat’ tih hlate pawhin hriat a hlawh hle a, lenglawng lamah tunhnai deuha C Lalkhawliana hla a sak ‘|huva Awmhar’ pawhin hriat a hlawh hle a ni.
Zaiin state pawn hmun hrang hrangah a feh chhuak tawh a, ram pawn tlengin a kal chhuak tawh a, 1968-ah phonograph record buaipuiin, Mizo zingah mimala siam hmasa ber pawl a ni a, Gauhati-ah record a ni. Zai intihsiaknaah lawmman pakhatna pawh a dawng nual tawh a, 1966, 1967 leh 1968-ah te Shillong-a |halfavang Kut-ah zai intihsiak lawmman pakhat a la zawn vek a, 1975 leh 1976-ah beat contest-ah an group-in best group an dawng a, 1978-ah Jyotu Prasad Agarwal Award for North East Outstanding Artiste Award a dawng a, 1980-ah LG Trophy a dawng tawh bawk. Heng bakah hian Mizoram chhuak chanchinbu hrang hrangin zai lama award an siam te pawh a dawng nual taw bawk a ni.
Lengzem hla chu hriat a hlawh tanna a ni a, 1971 khan Seventh Day Adventist Kohhran-ah baptisma changin a lut a, hemi hnuah hian mipui hmaah lengzem hla a sa leh ta lo a ni.
Vanhlupuii hi March ni 14, 1973 khan Lalthuama (L) nen inneiin, fanu pahnih leh fapa pakhat an nei a, a fate zingah a naupang ber Vanzaipuii la damin, a tute paruk a kalsan bawk a ni.