Zorinpuiah Border Trade Centre din thuai ngen

Mizoram Rajya Sabha MP K Vanlalvena leh Lok Sabha MP hlui, MNF vice president Vanlalzawma te chuan June 16 khan sawrkar laipui External Affairs secretary (East) Saurabh Kumar chu Delhi-a a pisaah kawmin, KMMTTP Road laih mek sawipuiin Mizoram leh Myanmar inrina Zorinpuiah Border Trade Centre din thuai tul an tih thu an thlen.
Zorinpui to Paletwa inkar lirthei kawngpui sial mek chu lei laih hna pangngai (formation cutting) zawh a ni tawh tih report an dawn thu leh kawngpui tlang hnuah chauh Border Trade Centre din a nih chuan a building sak chhung nen hmasawnna a tih khawtlai theih thu External Affairs secretary hi an hrilh a. kawng tlang ruala trade centre peih hman a nih theihna’n hma lak thuai a nih tur thu a lo sawi a ni.
KMTTP road laihnaah harsatna chi hrang hrang avangin hna thawh chak a harsat thu leh tunah erawh hna a tluan viau tawh thu Saurabh Kumar hian a lo sawi a. Bay of Bengal atanga Chhimtuipui lui kaltlanga bungrua a luh hunah chuan Mizoram mai ni lo hmarchhak state dangte tan pawh chhenfakawm tak a nih a beisei thu a sawi.
KMTTP hi India sawrkar leh Myanmar sawrkar ten April 2008-a inremna thuthlung an ziah hmanga bul tan niin, hetihlaia Mizoram Lok Sabha MP chu Vanlalzawma hi a ni. India sawrkar tirhin Sittwe lawngchawlh hmun atang hian Paletwa thleng lawngin an lo fang tawh a ni.