ZORO-in Manipur CM chhanglet

Manipur buainaa kaihhnawiha Manipur chief minister-in Mizoram kaltlanga ruihhlo kal vel nen chawmpawlha Mizoram lam chungchang a sawisel chungchangah ZO Reunification Organisation (ZORO) chuan ama state chhung thil thleng baka inrawlh lo turin thu a rawn.
ZORO Gen. Hqrs. thuchhuak chuan Manipur chief minister N. Biren Singh-a’n Mizorama ruihhlo kal vel Mizoram Police-in an man sak kaihhnawiha sawiselna tawngkam a nei chu tul lo a tih thu sawiin, Manipur CM chu Mizoram state chhung thil thlengah inrawlh buai lo turin an hriattir a, a inrawlh loh na turah a inrawlhah a ngai tih a sawi.
‘Manipur CM hian a state huamchhungah khawvel hmaah human rights a bawhchhia a, sawrkar leh police chakna hmanga Zofate min bei hi kan dem takzet. Manipur Governor-in an state tualchhung buaina thleng chu an state pawn, a bikin Burma ram atanga rawn chhuak anga a sawi hi kan dem hle a, Manipur tualchhung buaina hi an state sawrkar siam a ni tih hre nawn turin kan ngen,’ a ti.
MZP-in Manipur tualchhung buai avanga Mizorama Meitei awmte an sahimna tura pawn chhuak rih lo tura a lo hriattir tawh chu a thlawp tih ZORO hian a sawi bawk.