Zozia Silk-in National Award dawng

Silk Puanchei tah kawnga a thiamna leh hnathawhthat avangin Zozia Silk & Handloom hnenah National Merit Certificate Award hlan a ni.
Sawrkar laipui Ministry of Textiles hnuaia Development Commissioner for Handloom chuan Zozia Silk & Handloom neitu Laltanpuii hnenah award hi a hlan a. A award dawn kum hi kum 2018 ami niin, Covid hrileng avangin he award hnuaia a dawng tur zawng zawngten kumin hian an dawng kim thei chauh a ni.
Zofate zingah handloom lama National Award dawng thei pahnihna niin, kum 1988 khan Zodinpuii (L), Tuikhuahtlang chuan a lo dawng tawh a, hemi hnu ah tun hi Mizoram atanga dawng leh thei hmasa ber a ni. Award hian certificate leh sumfai Rs. 75000 a kengtel
Commerce & Industries minister Dr R Lalthangliana rampum huap chawimawina dawngtu chu a lawmpui thu sawiin, Pi Laltanpuii inzir zel peihna leh taimakna chu a entawntlak a tih thu te, a hlawhtlinna chuan midang a fuihphur a beisei thu te a sawi.
Commerce & Industries leh Sericulture-te chu department inhnimhnai tak, inmamawh leh inchawimawi tawn thin an ni, tiin, Mizoten tihtakzeta kan beih chuan, thil thiamchak tak kan nih thu sawiin, international market thleng phak tura ngaihtuahna seng zui zel turin heti lama hma latute a fuih.
DC Handloom hian puantah lama mi chungchuangte chawimawina chi thum – Sant Kabir Award, National Award leh National Merit Certificate Award an pe thin a. Heng award dawng tur hian selection committee pathum – Zonal, Headquarter leh Central Level committee-te paltlang a ngai a ni.