ZPM a sawrkar chuan infiammi & sports association ngaihsak tum

Mizoramah infiamna hmunhma nei tha viau mah ila, infiammi leh sports association-te ngaihsak an hlawh tawk loa, an sawrkar chuan ngaihsakin an tuamhlawm dawn tih ZPM chuan an sawi.
Thuthar thehdarhtute hmaah ZPM executive member Lalnghinglova Hmar chuan ZPM-in sawrkarna a chan chuan infiamna chu tih takzetin kalpuiin, ‘short term plan’ leh ‘long term plan’ an nei niin a sawi. Mizoramah sports-in nasa taka hma a sawn chu lawmawm an tih rualin, sports hmasawnna a kairual tawk lo deuh nia an hriat bakah infiamna hmunhma leh hmanrua nasa taka a than laiin, infiammiten ngaihsak an hlawh tawk lo nia lang chu thlak an tum dawn tih a sawi.
Kum 2019 – 2023 chhungin Mizoram State Sports Council hnuaiah project liantham 108 thawh a nih laiin, infiammite dinhmun erawh a la hniam hle a. Northeast Olympic Games, November 2022-a Shillong-a neih zawh takah hmarchhak state 8 zingah Mizoram 6-na a ni phak chauh chu infrastructure lam chauh ni lo, a infiamnaah hma sawn an mamawh zia a tilang tih a sawi a ni.
Sports-a hma an sawn dawn chuan a hmunhma neih that a pawimawh rualin a buaipuitu sports association thuamchak chu ZPM-in tulin an hria tih Lalnghinglova Hmar chuan a sawi a. Tunah hian sports association thenkhat chuan national competition-a an tel dawnin sum leh paiah harsatna an tawk nasa hle a, mimal sum pukchawpte pawh an awm thin niin a sawi. “Sawrkar tan puih vek sen a ni lo chungin, sports association-in an dawn tur Sports Promotional Fund hi ZPM a sawrkar chuan ennawn kan tum,” a ti.
Sports association-in anmahni puala hmunhma an neih chu ZPM ngaihpawimawh a nih thu te, a theih chin chinah state level recognised sports body-ten an duh leh mamawh huna an hman theih turin sawrkar sports hmunhma chu sports association-te nen a hman dan sawihoin, an ngaihdan dah pawimawh a nih tur thu te a sawi.
Infiammi tithate lawmman, Incentive Cash Award pawh ennawn a nih tur thu sawiin, Sports Council hnuaia recognised sports association ni ve si, Sports Incentive Award dawng lote pawh an sawrkar chuan pek an tum tur thu leh, infiamna hrang hranga coach-te thuamthat an tum dawn thu a sawi bawk.