ZPM-a tel hi thianghlim famkim nihna emaw an ti – Robert Romawia
ZPM-a tel hi thianghlim famkim nihna emaw an ti – Robert Romawia
ZPM-a tel te chu thianghlim famkim nihna emaw tiin, a ni ve lo te diriam leh engmah ti lo angin an ngai tih MNF adviser Robert Romawia Royte chuan a sawi.
Thawhtannia MNF office Mizo Hnam Run inkhawmah minister Robert Romawia Royte chuan ZPM MLA candidate list enin, chief minister atana Pu Lalduhoma enchhin duh tur chu tlemte an ni, tih a sawi a. ZPM chu inthlan dawn aruaia party-a thuneitu sangten an chhuahsan chu khawvel political history-a la awm ngai lo a ni tih a sawi. “An inzirtirna tha lo tak avangin kan mi hriatchian tak takte pawhin ZPM an nihna chu thianghlim famkim nihna emaw tiin ZPM ni ve lo chu an rawngbawlpuite thlengin bawlhhlawh leh thil tha engmah ti lo ang maiin an diriam fo mai,” a ti.
ZPM rorelna, Lunglei Municipal Council-ah pawh an hnathawh awmchhun chu car thar lei a ni, tiin, Lunglei mipuiin an thlang sual tih an hre tan mek niin a sawi. “Thianghlim famkima an inngaihna tak hi Pathian leh mihring tehna atang pawha an fail-na chu a ni. An thiltihah an nihna a lang lawi si,” a ti bawk.
Congress party chu an hun a liam tawh niin Robert Romawia hian a sawi. “Thenawm state-ah an tlachhe vek tawh a; Mizoramah pawh an hmalam hun a thim. ZPM ang maiin a fing apiangin an chhuahsan mek a ni,” a ti. ZPM, Congress leh BJP-a la awm mekte chu inngaihtuah chiang a, opposition-a awm reng ai chuan ruling party ni zui zel tur MNF-a lut ve turin a sawm tih a sawi a ni.
Sum harsat dan sawi changa, mi thenkhatin Zoram hmun tina development ruhrel lian tak tak siam, hawn leh sak mek tam zia sawi a, sum a harsa tak tak lo nia an sawi thin chungchangah MNF minister chuan, “Heng hnathawhna sum hi state annual plan ami niloin annual plan pawn atangin project based-in union budget sum kan hmuhte a ni tlangpui. Hengte hi hlawh leh healthcare adangtea hman theih a ni tlat lo,” a ti. GST atanga sum hmuh pung ta lutuk pawh hian sawrkarin hmasawnna hna a thawh tam zia a tilang reng tih a sawi.