Lawngtlai East Assembly biala ZPM party official candidate tur nia sawi, Lai Autonomous District Council member ni lai Dr Lorrain Lalpekliana Chinzah chuan District Council dan bawhchhiat a neih loh thu leh member atanga paih theih a nih loh a sawi.
LADC hnuaia Lawngtlai Chanmari biala independent ticket-a MDC-a thlantlin Dr Lorrain Lalpekliana Chinzah hi tunhnai khan LADC chairman hmingin insawifiah tura tih a ni a. LADC danah independent-a tling chuan member (MDC) a nih chhungin eng political party mah a zawm thei loa, a zawm dawn a nih chuan MDC a nihna atangin a bang tur a ni, tih inziak tlawhchhan hmangin, ZPM party-a a inpe emaw ZPM ticket-a MLA-a a ding dawn a nih chuan dan a bawhchhia a, MDC a nihna atangin ban theih a ni, tiin, ban (disqualify) a nih loh chhan tur sawifiah tura tih a ni.
Inrinni khan Dr Lorrain Lalpekliana Chinzah hian Lawngtlaiah thuthar thehdarhtute kawmin, MDC a nihna hlihsak a nih chuan court-ah kal a tum tih a sawi.
India Constitution Tenth Schedule-a tarlan MP leh MLA te an nihna hlihsakna dan chu Autonomous District Council-a elected member-te chungah hman theih a nih loh thu te, Khasi Hills ADC leh Chakma ADC te buaina chungchanga court order angin mipui thlanchhuah hruaitute chu paih theih a nih loh thu te a sawi. ADC-in elected member-te paih theihna dan a neih chu, India danpui kalh a nih avangin he dan hi hman theih a ni lo, tiin, chu chu Khasi Hills ADC leh CADC-a elected member thenkhatten court-a an khinna chuan a tichiang a, MDC a nihna chu LADC chairman hian a paih ngawt thei lo tih a sawi a ni.
Zawhna chhangin Dr Lorrain Lalpekliana hian ZPM danah candidate turin ZPM-ah membership fee pek kher a ngaih loh avangin a hranpa in ZPM-ah membership fee a pe lo tih a sawi a. LADC-ah erawh ZPM a support thu chairman hnenah a thehlut tih a sawi.
ZPM Gen Hqrs Legal Cell general secretary Vanlalsiama Pachuau chuan LADC chairman-in Dr Lorrain chu member (MDC) a nihna a hlihsak a nih chuan an dikna tilang turin court-ah kal an tum tih a sawi a ni.
ZPM candidate turin dan kalh a neih loh thu sawi
Get real time updates directly on you device, subscribe now.
Prev Post
Next Post