National Highway (NH) 6, Dulte to Champhai kawngpui sial mek chu Inrinni zing khan Transport minister TJ Lalnuntluanga chuan a hmunah a enfiah.
NH 6 Dulte to Champhai kawng package-III, Shri Balaji Construction Company (SBCC) siam mek chu company lamin an sawm angin minister hian a enfiah a. Kawng siamtu contractor-te chu mipuiin an nghahhlelh em em kawngpui siam hna chu zawh thuai a nih theihna’n chak taka thawk tur leh hna tlo leh tha, ram tana rotling tak hnutchhiah tum turin a hrilh a. Hetihrual hian environment dan ngaipawimawh turin a chah bawk. Kawng laih thar dunga thingphun dan tur pawh a sawipui.
SBCC project director Rajesh Puniya leh a thawhpuiten minister hi lo dawngsawngin, Khawzawl leh Champhai inkar kawng siam mek an enpui a. Fur lai a nih avanga leimin neuh neuh a awm thu leh duh anga chaka hna thawh a harsat rih thu an lo thlen. Furpui a zawh hunah Khawzawl leh Champhai inkar kawngpui siam chu zawhfel hman an tum thu an sawi a ni.
SBCC hian NH 6 Dulte to Champhai huamchhung package-III, Khawzawl leh Champhai inkar km 26.78 a thui, cheng vaibelchhe 370.43 senna tur an chang a ni.
NH kawng siam mek enfiah
Get real time updates directly on you device, subscribe now.
Prev Post