ZPM-in Manipur sawrkar dem
Mahni khua leh tuite ram nekchep zawnga Manipur sawrkarin hma a la chu ZPM chuan tha lo a tiin a dem takzet tih a sawi.
ZPM Gen. Hqrs. thuchhuak chuan, Manipur-a tlangmite leh Meitei inkara boruak tha lo chhuak a, tharum thawhna, Pathian biak in, chenna in inhal sak leh nunna chan an awm chu pawi a tih thu sawiin, boruak tha awm leh thuai se a duh tih a sawi.
‘Hetiang boruak tha lo tak mai chhuah chhan hi Manipur sawrkarin Zohnahthlakte ram chhuhsak tuma reserved forest-a Zofate luah chin ram engemawzat a puan vanga chhuak niin a lang a; mahni khua leh tuite ram nekchep zawnga Manipur sawrkarin hma a la hi a tha loa, Manipur sawrkar kan dem a ni,’ a ti.
Zohnahthlak hmun hrang hranga awmte chu unau kan nih avangin an harsatna chu kan harsatna, an lawmna pawh kan lawmna a ni, tiin, an tan ZPM party chu a ding reng dawn tih a sawi.
‘Manipur-in ILP a nei thar hi a lawmawm a, Manipur mipui kan lawmpui takzet. Chutih laiin Mizoramah Meitei tam tak an awm a, Meiteite hi kan unau, kan Mongoloid puite an nih avangin an lakah ILP kan ngiat ngai lo. Chutihrualin Manipur sawrkarin Mizo khualzinte hnena ILP a lo ngiat thin hi tha lo kan ti hle a, hetiang hi thleng tawh lo se kan duh bawk a ni,’ ZPM thuchhuak chuan a ti.
ZPM-in Manipur sawrkar dem
Get real time updates directly on you device, subscribe now.