ZPM-in office atan AR biak in ram neihsak ala tum ngai lo

ZPM-in office atan AR biak
in ram neihsak ala tum ngai lo
ZPM chuan anmahni pual party office neih tumin hma a la ngei a, Assam Rifles Kohhran biak in ram neihsak tumna erawh zaa za thu dik lo a ni tih an party vice president C Lalnunnema chuan a sawi.
Thawhtannia an party office-a inkhawmah ZPM Building Committee chairman ni bawk C Lalnunnema chuan, party office hmun nghet nei loin, man chawiin mimal in an la luah a; nikum atang khan party office, anmahni ta ngei an neih theihnan thawhlawm thawh turin party mipui, Unit leh Block an ngen a. Kumin kumtir khan Building Committee dinin, amah chu chairman-a ruat a ni a. Party office hmun tur dap chungchang chu a hrechiangtu a ni ve tih a sawi.
ZPM party chuan Assam Rifles ram chhuahsan chhunga biak in hmun chu party office atana neih tumna emaw, AR ram chhuahsan hman tangkai dan tur chungchangah emaw ngaihdan emaw, duh dan emaw an sawi ngai lo a. Sawrkarin mipui aiawh zo tura a din, pawl hrang hrang aiawh telna Advisory Committee ngaihdan leh ruahmanna chu mipui tana tha tawka an ngaih avangin an inrawlh ngai lo tih a sawi a. Assam Rifles biak in hmun an party office hmun atana neih tum anga puhna chu thudik lo a ni tih a sawi a ni.
Opposition party-ten dik lo taka an beih takah chuan kumin November 17 khan party hruaitute chu AR biak in hmun chungchang sawihoin an thukhawm a. ‘Assam Rifles ram chhuahsan chhunga AR Kohhran biak in leh a ram hi Presbyterian Kohhran hminga land lease siam a nih tawh avangin ZPM party chuan land lease neitu Mizoram Synod duh dan anga kalpui nise tha kan ti,” tiin thutlukna an siam a. Hei hi party-in official taka AR ram chhuahsan leh biak in hmun chungchang an sawi vawikhatna a ni tih a sawi.
ZPM Building Committee hian party office hmun tur leinan bank loan lak nise an ti a. Bank hotute pawh an dawr tawh a, in hmun lei tur an hmuh hunah loan la turin thutlukna an siam tih C Lalnunnema hian a sawi a. “Theihtawp chhuahin party office hmun tur hi kan zawng a. Aizawl khawpui laili-ah kan duh avangin kan hmuh chhun a to hlawm hle a. Vawiin thlengin party office tur kan la lei thei lo a ni. Unit hrang hrang, Block leh mimal atangin building fund atan donation an thawh khawm hi tun dinhmunah office hmun tur leina tham a la tling loa; bank loan la in ram lei kan tum mek a, kan la lei thei lo a ni,” a ti.