ZPM Political Affairs Committee-in Aizawl East-I bial vil tura an tih PL Liandinga chuan ziaka phatna a thlen chu an pawmsak tih an sawi a. PC Thalai chuan he thilah hian thu inkawkalh a awm tiin sawifiah turin ZPM hi an phut ve thung.
ZPM PAC thuchhuak chuan Aizawl East I ah an party-in chakna a chan ngei theihna’n viltu tura ruat Pu PL Liangdinga’n a taksa chak tawk lohna avanga a vil zui theih dawn loh thu ziaka phatna a thlen chu an pawmsak tih a sawi a. An party Nomination Committee hmalakna kalzel chu tha an tiin, ram pumah candidate tha tak tak an chhawpchhuah sak an beisei tih a sawi.
Thla 5 chauhin MLA inthlan a dan tawh laiin, ZPM hmasawnna kalzel thlirin Pathian leh mipui zarah sawrkarna an chang ngei turah an inngai tih PAC hian sawiin, sawrkarna an chang a nih chuan, an intiam ang ngeiin kalphung thar – mipui sawrkar an siam dawn tih an tiam thar tih an sawi a ni.
ZPM PAC thuchhuak chungchangah hian PC Thalai Hqrs. chuan thuchhuah siamin, Aizawl East I bial vil tura ZPM-in a ruat Pu PL Liandinga’n an party hotuten inhnukdawk tura an ngen avangin Mizopa taka inhnukdawk ta a nih thu amah ngeiin a sawi laia, ZPM thuchhuahin Pu PL Liandinga hi ziaka inhnuhdawh a dil avanga East I chhuahsan ta anga an sawi leh si chu mak a tih thu a sawi.
‘Mipui hian ram hruai tura inhuam political party-te atang hian thu tak leh belhchian dawl kan beisei tawh hle laiin, party pakhat atanga thu inmil lo, mipui ti luhai thei zi chhuak thin hi pawi kan ti a; mipui tham lohna leh palzutnaah kan ngai a; Pu PL Liandinga chungchanga thu inkalh awm pawh hi a rang thei ang bera sawifiah turin ZPM party kan phut a ni,’ a ti.
ZPM-in phatna pawm PC-in ZPM sawifiah phut
Get real time updates directly on you device, subscribe now.
Next Post