ZPM leader thusawi atang hian zu khap hlawhchham zia a tilang – CLP leader

ZPM leader-in vantlang hmuna zak miah loa zurui an chet thin thu a sawi chuan tun sawrkara zu khap hlawhchham zia a tilang chiang hle tih Congress Legislature Party leader Zodintluanga chuan a sawi.
CLP leader hian thuchah siamin, ZPM leader Lalduhoma’n Mizoram anga vantlang puipunnaa zak miah loa zurui an chet thin chhan chu kan society-in a pawm vang leh kan dem nat tawk loh vang, tia a sawi chu a pawm lo tih sawiin, dan leh thupek kenkawhna a hlawhchham vang zawkah a ngai tih a sawi.
Congress sawrkar laia dan hnuaia zu zawrh tan tirh lamah zurui hmuh tur an tam a. Dan tha taka kenkawh niin, zuruih avanga mante chu vantlang hna thawhtir an ni a. Hun a kal deuh hnu chuan khawlai chu sawi loh, puipunna hmunah zurui hmuh tur an awm meuh tawh lo tih a sawi.
Mizote society tha tak nei kan ni tiin, “Puipunna hmuna zurui hau chiam duh khawpa midang hnawk ti tam lohna society kan ni,” Zodintluanga hian a ti.
Vantlang hmuna zuruih chu a thlawp loh rualin, ZPM leader sawi anga vantlang hmuna zuruite zak map loa an lo che thin a nih chuan kan society niloin, dan leh thupek kenkawh that loh vangah a puh zawk tih a sawi a. Vantlang hmuna zurui chu dan anga hrem a, man ni thin se chuan tumah an ruih ngam a ring lo tih a sawi.
CLP leader chuan sawrkarin a hming maiin zu zawrh a titawp a. Zu tihrem tumna tak tak nei loah sawrkar a puh. “Sawrkarin zu zawrh khap siin dan leh thupek kengkawhtu a thuamchak tha duh lo,” a ti.