ZPM sawrkar hnuaiah chuan hna a tha tur a ni – Lalthansanga
ZPM sawrkar hnuaiah
chuan hna a tha tur a ni
– Lalthansanga
ZPM sawrkar hnuaiah chuan hna a tha tur a ni a, a tha lo chu sawrkarin hna endik tura a din State Monitoring Committee-in a umzui zel dawn tih minister Lalthansanga chuan a sawi.
Aizawl East-I bialtu MLA ni bawk Lalthansanga hian Inrinni khan a bial chhung Sihphirah mipui a duh apiang tan dawr theihin hun a hmang a, mimal leh pawl hrang hrang engemawzatin an harsatna leh mamawh an thlen.
Zoram kalsiam din thar leh a, kalphung thar leh dik taka kal an tum a. Chumi tur chuan huaisen takin sawisel pawh huamin hma an la chho mek tih minister hian a sawi. Mitinin anmahni dikna chanvo theuh an chan chu an duhthusam a ni a, zawi zawiin a dik chho tan nia an hriat thu a sawi bawk.
“Kan policy, Bana Kaih hi sum sem a ni ve loa, Chief Minister Special Package pawh hi grant a ni a; mi taima leh thawkrim tana chhawr nahawm tak tur a ni. Thalai lehkhathiam leh mi taima, mahni kea din chhhuah tumten bul an tan theihna tura a pung awm loa loan an lak theihna tur ruahmanna a ni,” a ti.
Ruihhlo bawiha thalai tang mekte chhanchhuahna lamah pawh nasa takin hma an la zel a. Hnam anga kan dam leh theihnan leh Zofate kan insuihkhawm theihnan hma an la mek tih Lalthansanga hian a sawi. “Hnam zahawm kan nih theihnan ei leh barah kan intodelh a ngai a, ram pawn atanga kan thil lakluh tam tak hi kan ramah kan thar ve thei a, loh theih loha kan ram mamawh lakluh ngaite pawh kawng khat chauh niloin kawng dang atanga lakluh dan ngaituahin chak taka hma lak zel a ni,” a ti.
ZPM sawrkar hnuaiah chuan hna a tha tur a ni a, a tha lo chu sawrkarin hna endik tura a din State Monitoring Committee in a umzui zel dawn tih minister hian a sawi. Hna vil chungchangah sawrkar kuta dah pumhlum mai loin mitinin kan mawhphurhna a ni tih hria in, sawrkar hotute hnenah rang taka report nghal zel turin mipui a chah tih a sawi a. “Chutianga hma kan lak chuan kan ram tan leh kan tu leh fate tan hmasawnna rotling kan nei theih ngei kan beisei a ni,” a ti.