ZPM Sawrkarin enge a tih? Pawisa a vang in ti maw?

K. Hmingthankaia
Ka thil sawi tum hi a tawi thei ang ber leh fiah tak siin sawi ka’n tum ang e.
Politician Sihal putar thankin pui pui leh, a ka kaw nazawng Opposition ho hian, remchang an hmuhna apiang leh, eng dawhsan leh eng hmunah pawh, eng hunah pawh hian ZPM an sawichhe char char ringawt mai hian a entir chu – ZPM hian a hma amite ang lo takin kalphungthar thil tha an ti mek zel a. Chu chu thikin, an lo khawsak dan mualphonaa ngaiin, theihtawpin mipui rilru hruai kawi tumin, Setana ang chiahin thil tha leh thil tha titute chu tihchhiat an tum ta ngar ngar tihna a ni. Patling thankin pui puiin, ni tin zan tin, ZPM chu chuti khati tih reng hi a ninawm a, mipui, mi pangngai chin hi chuan ZPM Sawrkar hi chuti tehchiama demna emaw, rinhlelhna emaw, sawisel tur em em hi kan la hre mang si lova. A lo ngaithlatute hi mi â vek kan ni bawk si lova, a sawitute leh an thil sawi hi chu ngaihdan chin kan lo nei ve mai a ni.
Social media leh press conference vela a ka kaw nazawngin thil ropui dang sawi tur hre thlawt si lovin, ZPM ringawt in beih ngar ngar hian a entir chu maw- In tluk lo lutuk a, in itsik lutukin in rilru chhia in phawrh lang mai mai a ni e. Chu chu Khawvela Setana hnathawh awm dan chu a ni reng a ni.
ZPM-in thil tha tih liantham an nei ve lo in ti maw- Ih maw, nangni ang khan, eirukna remchang siam nana, tul em em lova eng eng building sak emaw, phullem phah tihvel leh, eng eng project emaw kha buaipui hmasak bera neih kha an tum ve awzawng lova. A pawimawh hmasa ber leh, he leia kan damchhung leh kan thih hnu thlenga pawimawh ber, mihring, mipui rilru hi siamthat phawt an tum a. Mipui rilru a hrisel that phawt chuan, hmasawnna dik tak leh tlo, tha leh tluantling chu a lo thleng zel mai dawn a ni. Kan rilru put hmangte, kan awm dan hrim hrimte, kan hna thawh dante, sawrkar hna leh sawrkar hnathawk zawng zawngte hi a bul atanga siam that phawt an tum a, an siam tha mek bawk a ni.
Mi ram leh mi State changkangte tih danin, Sawrkar hian sum, pawisa hum dan leh tihpun dan hrang hrangte a dap mek a nih hi. Chhiah thar an la ngam te leh, chhiah hrang hrang, Sawrkar source hrang hrang lo pung chho mekte hi kalphung tha leh, hmasawnna beiseiawm tak chu a ni lo em ni?
Tunhma anga thawk mang lo leh thawk chhe takte, a thlawna dawnte, ni khat tla emaw, kar khat tla tawk emaw zawnte, pawisa thianghlim lo zawn vak vak te kha in la kham loh vangin, theih tawp tawpin ZPM in sawichhe mai mai a nih hi. Mahni tluklohte lo chu kan sawi kan sawi chhe peih reng lo. Eng hunah pawh patling intifing hmel fu fu-in ZPM sawichhiat ringawta in au in au hi zahpui-awm te pawh kan lo ti thin che u asin.
Pawisa a vang in ti maw- A vang awzawng lo. Kan ram, kan Sawrkar pawisa hi a pung tual tual tih hi in hrepha ve tho. Kan ram leh kan Sawrkar pawisa te hi a nih dan tur dik tak leh a hman dan tur dik takin a kal mek a nih hi. Sawrkar hna leh Sawrkar hnathawkte pawh a nih dan turin an kalpui mek a nih hi. Chu chu nangni’n in lo thik mai mai a nih hi.
Mipui-ah pawisa a vang in ti maw- A teuh lo. Tunge ZPM vanga chaw nghei? Tunge ZPM vanga ration lakna nei lo? An lo awm a nih pawhin, chutiang chu eng hunah pawh thil awm thei thinsa reng a ni. Tunhma angin corruption, smuglin, pawisa thianghlim lo leng nuaih nuaih thin kha a bo ta duak a. Mi ten dik tak leh fair takin, thlamuang takin pawisa an thawk chhuak tawh zawk a. Dik tak leh fair takin, fim takin a hmanna tur dik takah pawisa hman an thiam tawh zawk vang a ni. Chu chu ZPM-in mi rilru a siam that mek vang a ni. Chu chu changkanna leh hmasawnna dik chu a ni ngai.
Tunhma anga engemawti mai maia pawisa hmuh theih avanga ruih huai huaina turte, duh duh lei pup pup na tur pawisa thianghlim lo a van tak avanga, pawisa a vang ti mai mai in nih hi.
Hetia dawhsan leh dawhsan loh atangte, hmun tin remchang lai apianga ZPM in sawi sek hian, in nihna leh in rilru a tilang mai mai a, ZPM inti lian daih zawk. Mipui pawh hian kan hne che u. ZPM hi Vantirhkoh hlang Sawrkar an ni lo. Tihsual leh tih diklohte an neih hunah chuan, kan vaiin kan tangtlang mai dawn alawm. Thil dang tihpuitlinpui che u chakawm deuhte hi lo sawi ve tawh thin ula.
Tunah hi chuan ZPM hian a pawimawh hmasa ber leh tih tur dik tak hmasa ber, kan rilru, kan awmdan leh kan tih dan thinte siamthat phawt an tum mek a nih hi. Chumi dawtah hmasawnna dik leh tlo, tha leh tluantling chu a lo kal zel mai dawn alawm. Chu chu kan vaiin kan chhawr mai dawn alawm.
Rilru hrisel tak puin, tha te te hian lo awm ula, ZPM siam that saah hian in la sawrkar leh mai thei asin.
ZPM |ANG FAN FAN