ZPM sawrkarin health care policy an duang hleithei lo – Dr Lalmalsawma

ZPM sawrkarin health care
policy an duang hleithei lo
– Dr Lalmalsawma
ZPM sawrkar chuan kum khat dawn hnu ah pawh a insawi ang lo takin health care policy thar a duan hleithei loa, mipui beiseina chanve chanve leh pawh a tihlawhtling lo tih Congress hruaitu Dr Lalmalsawma chuan a sawi.
Sinlung Hills Council inthlan tura campaign mek MPCC treasurer Dr Lalmalsawma chuan, mahni intiamnaa ding lo sawrkar kan hrawn mek tih a langchiang tih a sawi a. An sawrkar hnuah kum khat dawn a kal tawh chungin, health care policy an duang hleithei loa, tunah October 2024 atanga March 2025 thlenga hman tur chhungkaw khat tan cheng nuai khat an rawn ti ve thei chauh tih a sawi.
“Mipuiin beiseina kan neih san tehlul nen, kan beiseina chanve chanve leh pawh an rawn ti hlawhtling thei lo leh ta phawt a. Natna hautakin a tlakbuak, inenkawlna atan healthcare scheme thlahlel ngawih ngawih tan beidawnna a thleng mek,” a ti.
ZPM sawrkar chu ration buhfaiah a hlawhchham a, hmunphiah leiah a hlawhchham a, sum inrenchemah a hlawhchham a, mahni intiamnaa din kawngah a hlawhchham fai vek tih kan hmu chho mek nia sawiin, MNF sawrkar nen an danglamna a tam lo ta viau niin a sawi.
Congress sawrkar chuan a intiamna aia tam daih, chhungkaw 140000 dawn NLUP hmangin hlawhtling takin a chhawmdawl thei a, vawiin thlengin NLUP avanga eizawnna ngelnget neih phah ta chhungkaw sing tel Zoram dung leh vangah hmuh tur an la awm tih MPCC treasurer hian sawiin, “Tawngkam thiamna leh tih hlawhtlin theih loh tur ngaihnawm tak sawia mipui beng ti tlai ringawt ve ngai lo Congress party hi a tho kang mek a ni,” a ti.