ZPM Upa-ten tawrhpui

May 27 atanga thlipui leh ruahpui (Remal Cyclone) avanga Zoram hmun hrang hranga chhiatna nasa tak thleng chu ZPM Upa Committee chuan pawi a tiin, nunna chan chhungkuate, in leh lo chan, eizawnna chhia leh harsatna hrang hrang tuartute a tawrhpui a, pawi a ti takzet tih a sawi.
Upa Committee ZPM Gen. Hqrs. thuchhuak chuan, khuarel chhiatna avanga harsatna tawk, chhawmdawl nana tha leh zung sum leh pai sengtu zawng zawng hnenah lawmthu sawiin, Remal Cyclone vanga harsatna tuarte chhawmdawlna atana Mizoram sawrkarin cheng vaibelchhe 15 a ruahman pawh lawmawm a tih thu a sawi.
‘Mizoram sawrkar pian hnua la awm ngai lo, nunna chante ralna atana cheng nuai 4 (ex-gratia) a ruahman hi ropuiin, athlamuanthlak a ni,’ a ti bawk.
Zoram nu leh pa nih tling, kalphung thar leh mipui sawrkar kalpuitu chief minister kan nei tih Upa Committee hian sawiin, thlamuanpui awm a tih thu leh thawhpui tha tak tak petu Pathian hnenah lawmthu an sawi thu a sawi a. ‘Zoramin chhiat a tawh lai a, kan minister, MLA, party hruaitute leh official-te chet lakna hi kan thlamuanpui takzet a. Lusun chhungte, tuartute leh chhawmdawlna thawktu zawng zawngte Pathianin thlamuana awmpui tlat turin kan duhsak a ni,’ a ti.