ZPM VC suspend mai niloin thiat turin MNF-in phut

Sawrkarin a suspend rih Sumsuih khuaa ZPM Village Council chu suspend mai niloin thiah (dissolved) tlak zawk an ni tih MNF party chuan an sawi.
Aizawl South III, South Block MNF thuchhuak chuan Sumsuih VC suspend ngai khawpa a awm chu pawi a tih rualin, ZPM Gen. Hqrs. in lo vuipui a, thiamthu a sawipui chu Sumsuih khawtlang an zah lo hleah a ngai tih sawiin, Sumsuih mipui tam zawkin VC suspend chu awm an tih lai a, ZPM Gen. Hqrs-in dan bawhchhe zawk an tan tlat chu, mipui sawrkar siam tum kalphung thar zia tur em ni dawn tih chu an zawhna a ni tih a sawi.
Sumsuih safety reserve chhungah Gram Sabha remtihnaa VC hmasaten bawng vulhtu mi panga tan bawng in sak a remtih ruala, bawng chaw hmun tur an dil tel chu safety reserve chhung ramngaw a chereu dawn avangin an pe thei loa, tuna VC-te hnena an dil leh hnu ah an pe a, pek zingah hian ZPM VC member leh VC vice president pa te pawh an tel niin an sawi. VC thil tih dik lo hi Sumsuih khawtlangten MNF Unit-ah zualkoin, hma la tura an ngen angin hma an la tih an sawi a ni.
VC-ten an zawhna an chhan duh loh avangin DLAO-ah an zawt a. DLAO hian a lo ngaihpawimawh avang leh ziaka lehkha thehlut tura a lo tih angin MNF Unit hian complaint an thehlut a, field inspector chu a hmuna enfiah tura tih niin, report a pek hnu, MNF Unit-in lehkha a thehluh hmangin Ombudsman hmaah Sumsuih MNF Unit leh VC ten hearing an nei ta tih an sawi a ni.
‘A hmuna department aiawhten an enfiah hnua thil langchiang ta chu, ram hawhtir (temporary land lease) emaw ram pek (permanent allotment of land) pawh nise, dan kalha thil tih a awm a. Section 5 (1)(a) of the Mizoram (Forest) Act 1955 chuan, state sawrkar phalna (permission) lak hmasak zet phawt loh chuan mi tumahin village safety reserve chhungah thing an kit tur a ni loa, engemaw thil dang atan he reserved huamchhung ram hi an hmang tur a ni lo. Thing ro (dead tree) chu an khawtlang tana tha thei tur ang berin VC-in a dek ral thei ang, tiin a sawi,’ an ti.
Forest Act an bawhchhiat hmanga suspended an ni chu dan an bawhchhe ngei a ni tih chiang taka a lan avangin, Sumsuih VC-ten Village Safety reserve an vawnghim zo loa, Section 5(1)(a) leh Section 19 of the Mizoram Forest Act 1955 an bawhchhiat avanga sawrkarin The Lushai Hills District (Village Council) Act 1953 Section 25(1) hmanga a chawlhtir chu, suspend mai niloin thiat ngei turin sawrkar an phut tih a sawi a ni.