Zu in tam loh pawhin BP sang risk a ti sang

Zu in tam loh pawhin BP sang risk a ti sang
Zu hi tlem tlema in chu taksa tan a pawi lo niin kan ngai a ni mai thei, mahse, tun hnaia mithiam ten zirchianna an neih thara an hmuh dan chuan zu hi tlem tlem a in pawhin BP sang neih theihna risk a tisang thei niin an sawi a, kar khatah zu no 7-13 vel in pawhin BP sang neih theihna risk a tisang thei niin Times of India health section-in a tarlang.
He zirchianna an neih thar hian tunhmaa zirchianna atanga an lo hmuchhuah tawh tlem tlem a zu in hian lung (heart) natna chi hrang hrang risk a tihniam thei an tih thin chu a rawn hnial kalh ve leh ta tlat mai a, mahse, tunhma lama zirchianna neitute hian zu tlem tlem in leh BP sang inkaihhnawih theih dan bik hi an la zirbing ngai lo a, mahse, BP sang hi heart attack leh stroke risk tisangtu a nih miau avangin zu tlem tlem in hi lung tan a tha niawma sawi thin chu a rawn chawk chhe ta a ni.
Zirchianna neitute hian US-a puitling 17,059 te National Health and Nutrition Examination Study (NHANES) a kum 1988 leh 1994 inkara in ziak lut te data atangin zirchianna hi an nei a, zirchiannaa participant-te chu questionnaire chhan tir an ni a, chutah chuan an zu in thin dan chiang taka tarlan tir an ni, an chenna-inah tlawh chhuakin an BP leh endik sak thin an ni.
Participant-te chu group thumah then an ni a, zu in ngai lo, kar khatah zu no 13 aia tlem in thin (moderate drinker) leh kar kharah zu no 14 chin in (heavy drinker) ah then an ni. BP sang pawh Stage 1 hypertension chu systolic blood pressure 130-139 emaw diastolic pressure 80-89 niin, Stage 2 hypertension chu systolic pressure 140 aia sang emaw diastolic pressure 90 aia sang ah an then bawk.
Tichuan zirchianna neitu ten an hmuchhuah tak chu, zu in ngai lo te aiin moderate drinker (tlem tlem in thin) te chuan stage 1 hypertension neih theihna risk 53%-in an nei sang zawk a, stage 2 hypertension neih theihna risk a let hnihin an nei sang zawk bawk
Zu in nasa (heavy drinkers) te phei chuan zu in ngai lo te aiin stage 1 hypertension neih theihna risk 69%-in an nei dang zawk a, stage 2 hypertension neih theihna risk pawh a let 2.4-in a sang zawk bawk.