Zu khap zirchiannaa mi zawhte CM-in a zawt let

Zu khap zirchiannaa mi
zawhte CM-in a zawt let
ZONET News chuan Mizorama zu khapna dan hman mek chungchanga mi thenkhat ngaihdan a lakkhawm leh a zirchiannaah kohhran hruaitu, khawtlang hruaitu leh Excise department ami ngeite pawhin dan anga zu zawrh leh mai an thlawp nia a sawi chu chief minister chuan chhangletin, heng mite hi tute nge sawifiah turin a zawtlet a, an ngai thutak hle tih a sawi bawk.
Thawhtannia an party office-a inkhawmah MNF president ni bawk Zoramthanga hian April 15 zan ZONET chanchinthar puanah, zu khapna dan – ‘The Mizoram Liquor Prohibition Act 2019’ an zirchiannaah zu zawrh thlawptute zingah sawrkar hnathawk, kohhran rawngbawltu leh khawtlang hruaitu engemawzat an tel nia a puang chu mak a tih hle tih a sawi.
“Zonet hian zu zawrh thlawpna lam thu chanchinthar ‘headline’ meuhah hmangin zu zawrh leh a nih theihna tur lam hawiin a zirchiangtu tur an intir niin a lang thei a. Zu hi zawrh a nih leh theihna tur ‘goal’ a khalh luh tumna ngar ngar leh hetiang hmalakna an rawn chhawpchhuak hi pawi ka ti a, kohhran rawngbawltute sawilan a ni phei hi chu a pawi takzet a ni,” a ti.
Zonet hian tute nge an contact tih an sawilang lo tih sawiin, “Excise department-a thawktu pakhat sawi dan tih te, mi thenkhat sawi dan tih te bakah kohhran hruaitute zing amiin zu zawrh leh chu tha an ti, ni te in a puang a; hei hi MNF chuan kan ngai thutak hle a ni,” a ti.
MNF president chuan Presbyterian Kohhran hruaitute, Mizoram Baptist Kohhran leh kohhran dang hruaitute hian zu zawrh chu tha an tih a ring lo nia sawiin, MNF pawhin zu zawrh leh tha an ti loa, zu zawrh chhunga dik lo tak leh dan pangngai lo taka thihna a thlen tam zia an hmufiah tawh niin a sawi. “Kan tawrhna kha rapthlak kan ti a, mihring nunna thâp tur leh chhungkaw kerhdarhna thlen turin zu hi zawrh nawn leh chi ah kan ruat lo,” a ti.
Zu chungchangah MNF party chuan dinna a nei sa avangin, kohhran hruaitute pawhin zu zawrh leh chu tha an ti lo a nih chuan chiang taka an sawi nawn leh a pawimawh hle tih Zoramthanga hian a sawi a. Sawrkar hnathawk, kohhran hruaitute leh khawtlang hruaituten zu zawrh chu tha ti zawk nia ngaih theih tura ZONET-in a puang chu tih chian a ngai hle tih sawiin, “The Mizoram Liquor Prohibition Act 2019 hi Mizo mipui, kohhran hruaitute leh MNF party duh dan anga siam a ni,” a ti.