Zu zawrh duh chuan huaisen taka zawrh tir mai turin ngen

ZPM sawrkar chuan zu khapna dan, ‘the Mizoram Liquor (Prohibition) Act 2019’ chu an hmang nge, he dan hi hnawlin zu zawrh tumin zu an thlah zalen mek tih BJP Mizoram chuan an zawt a. An zawrh duh chuan huaisen deuha zuar law law mai tur leh, MLP Act 2019 hi an hmang a nih chuan dan leh thupek huaisen taka kengkawh turin an ngen tih an sawi.
BJP Mizoram State thuchhuak chuan, tunlai hian Aizawl khawpui leh hmun dang dangah zu a tam hle tih a sawi a. Mizoram sawrkarin MLP Act 2019 hi a hmang nge, he act hi hnawlin zu zawrh tumin zu a thlah zalen mek tih a zawt.
Sawrkar hmasa atangin zu hi khap ni mah se, a ruka a zalen zia chu hriat vek a ni, tiin, engtik lai pawhin zu in mi chuan duh hunah lei tur an hmu a. Tun dinhmunah Aizawl khawpui restaurant tam takah zu an zuar tel a, hei hi sawrkar hian a hre lo der nge, tih a zawt bawk.
‘Mizo nula leh tlangvalte, engemaw changa intihhlim mamawhte pawh an ni ve bawk a, tun anga khap ni chung a, zalen taka zu awm reng tho si ai chuan, dan siamtha in legalise se, a ruka zu zawrh mek hi dan hnuaiah zawrhtirin, a hlawkna pawh sawrkar hian tel ve ta zawk mai se. Chutiang a ngam lo a nih chuan, tuilairapa awm loin an dinnaah huaisen taka ding tlang turin ZPM sawrkar kan ngen a ni,’ BJP Mizoram hian a ti.
Kalphung thar zuartute ah kalphung awmze neilo kan hmu fo chu a fuhlo hle tih pawh sawiin, kalphung ngai reng, a mihring leh tawngkam chauh thar chu Mizoram mipuiin kan beisei dan a ni lo tih a sawi bawk.