Zudio LPS Pro Fight inbuk hun ruat fel

Zudio LPS Pro Fight tan hun sawn hlain November ni 1 tura ruat fel a nih hnuah inbuk hun atan October ni 28 ruat fel ve leh a ni.
Thawhtanni zing dar 8 atanga chhun dar 12 thleng LPS Arena, Falkland-ah boxer an inbuk dawn a, an hriselna endik hmasak a ni ang.
Pro Fight vawi 11-naah hian weight hrang panga – fly, bantam, light, welter leh middle-ah champion nih an inchuh dawn a; October ni 19 thleng tel tum tan LPS Office, Zarkawtah entry form thehluh theih a ni.
Hriat theih chinah boxer 200 chuangin entry form an lachhuak tawh a, mi 100 chuangin thehlut tawh bawkin, he’ng zingah hian Meghalay atangin boxer pahnih an tel.
December kar hmasa berah Title Fight neih tura ruahmanna siam lawk a ni a, title humhim turin bantam champion Laldinsanga, welter champion Lalruatzela Hauzel leh middle champion C. Lalhruaitluanga’n an inlan dawn tih an sawi chiang tawh.
Hetih lai hian fly champion NT Lalbiakkima dinhmun a chiang lo a, rilru lama harsatna a neih avangin title humhim turin a inlan theih a beisei sang lo.
HC Lalramfela’n light title a kawl mek kalsanin welter-ah a insawn dawn tih a sawi ve thung a; kum 2015 bantam champion hian Pro Fight chanchina weight hrang pathuma champion hmasa ber nih tumin chona a hmachhawn dawn a, tun hi Pro Fight bika a inhnek hnuhnun ber tur a nih thu a sawi bawk.
Nikum khan weight hrang pangaah boxer 281 an chhuak a, kuminah boxer tam zawk an tel ngei Organising Committee chuan a ring a; mimal chawimawina tel loin lawmman pawisa fai Rs. 6,50,000 semchhuah a ni dawn a ni.