2023 MLA inthlan atan vote nei 851895 an awm
Kumina Mizoram MLA inthlanpui neih turah vote nei 851895 an awm a, service voters 4973 an awm.
Election Commission of India thuchhuak angin Mizoram puma Photo Electoral Rolls Special Summary Revision 2023 neih a nih hnu ah Nilaini khan final electoral rolls hi mipui en theihin district tinah district election officer-ten an tichhhuak.
State puma voters 851895-ah hian hmeichhia an tam zawk a, 438925 an ni. Mipa voters 412969 awmin, mipa leh hmeichhiaa inziaklut lo ‘third gender’ pakhat awm anga tarlan a nih laiin, amah hi mipaah a inziak lut leh si a, hei hi a awmna district-a election buaipuitute pawhin an hre hman naa, final roll siam lai hian siamthat a nih loh avangin, third gender hi pakhat awm angin ECI-ah chuan report a ni hman tawh a, roll ennawn leh huna siamthat tur a ni tih chief electoral office Mizoram hotute chuan an sawi. Hei vang hian mipa hi 412970 ta tihna a ni.
Roll thar berah chuan Mizoram pumah service voters mipa 4884 leh hmeichhia 89, a vaiin 4973 an awm a. Mizoram pumah polling station 1276 a awm a ni.
Aizawl district-ah Assembly constituency 12-ah voters 286807 awmin, mipa 134249 leh hmeichhia 152558 an ni a, mipa aia hmeichhia tamna hi 18309 a ni.
Draft photo electoral roll atanga final photo electoral roll-a voter punna chu 5615 (2.00%) a ni a. 13-Aizawl East-I bialah voter punna percentage a sang ber a, 4.06% a ni. 14-Aizawl East-II (ST) bialah 0.81% a voter punna chu a hniam ber a ni.
Aizawl district-a voter tlemna ber polling station chu 7/26- Chhanchhuahna P/S niin voter 85 an awm a; voter tamna ber chu 13/24-Zemabawk-VIII P/S niin voter 1481 an awm.
Aizawl district-ah EPIC 100% tih tawh a ni a. Roll-a chuang zawng zawng hi EPIC pekchhuah vek an ni tawh. Aizawl district-a bial 12-ah hian polling station 321 a awm a, average-a lakin polling station pakhat zelah elector 894 awm ang an ni. Service voter 1733 an awm bawk.
Sl.No. DISTRICT M F TOTAL
1 Mamit 32723 32064 64787
2 Kolasib 30603 32859 63462
3 Aizawl 134249 152558 286807
4 Champhai 27880 29300 57180
5 Serchhip 26265 27887 54152
6 Lunglei 49645 50491 100136
7 Lawngtlai 45685 45754 91439
8 Siaha 21614 22875 44489
9 Saitual 27572 28102 55674
10 Khawzawl 8697 8778 17475
11 Hnahthial 8037 8257 16294