2023 World Car of the Year – Hyundai Ioniq 6
2023 World Car Awards an sem ta a, Hyundai Ioniq 6 a langsar hle a, 2023 World Card of the Year award a dawn bakah Electric Vehicle of the Year leh Design of the Year award te pawh a dawng a, 2022-a Ioniq 5-in award a lo dawn tawh ang chiah a rawn dawng leh ta vek a ni. Nikum khan Hyundai Ioniq 5-in 2022 World Car of the Year bakah Electric Vehicle of the Year leh Design of the Year award te a lo dawng tawh bawk a ni.
World Car of the Year category-ah hian BMW X1/iX1 leh Kia Niro te nen finalist an ni ho a, a tirah chuan car chi hrang hrang 30 he category-ah hian nominate a ni a, chuta tang chuan finalist pathum an thlang chhuak leh a ni. Award dawng tura nominate ni thei tur chuan kum khata car 10,000 tal siam chhuah a ni tur a ni a, luxury car anga manto ni si lo, khawvela car market lian China, Europe, India, Japan, Korea, Latin America leh US zinga ram pahnih, khawmual pui hran a mi ve veah tal hralh chhuah an ni ngei tur a ni a, January ni 1, 2022 leh March ni 30, 2023 inkar a nih a ngai bawk.
Hyundai Motor Company President leh CEO ni bawk Jaehoon Chang chuan, “He chawimawina hlu tak mai hi a zawna kum hnih kan dawng thei hian min tiphur tak zet a, electric vehicle heng Ioniq 6 ang chi te zawrh chhuah a nih theih nana Hyundai Motor Company hnuaia thawktu zawng zawng te thawhrim rah a ni. He chawimawina hian electric vehicle lama khawvela hmahruaitu nih tuma kan beihna leh inpeknaah min tichak lehzual dawn a ni,” a ti.
Electric Vehicle of the Year category-ah hian Ioniq 6 bakah BMW i7 leh Lucid Air te chu finalist an ni. He category-a lang thei tur hi chuan kum khatah electric vehicle 5,000 chin hralhchhuah a ngai a, thil dangah chuan a danglam lo.
Panel-ah design expert paruk- Jaguar design director thin Ian Callum pawh a telna ten 2023 World Car Design Award finalist pathum an thlang a, Ioniq 6 bakah Range Rover leh Lucid Air te niin, Ioniq 6 bawkin award a dawng leh ta a ni.
2023 World Performance Car of the Year chu Kia EV6 GT-in a dawng a, he category-ah hian Nissan Z leh Toyita GR Corolla te pawh finalist-ah an lang a, Kia hi Hyundai Motor Group a tel a nih avangin Hyundai hian award paruk zinga pali an dawng tihna a ni.
2023 World Luxury Car of the Year Award chui all-electric Lucid Air-in a dawng a, he category-ah hian BMW 7 Series/i7 leh Genesis G90 te pawh finalist-ah an tel. Lucid Air hi electric vehicle a ni a, tihian kumina award dawn theih paruk zinga award panga chu electric vehicle-in an dawng a ni.
Heng award hrang hrang te hi khawvel ram hrang hrang 32 a automotive journalist 100 rualin an thlan a ni
2023 World Car of the Year – Hyundai Ioniq 6
Get real time updates directly on you device, subscribe now.