2024 Olympics: Gymnast Carlos-a lawmman dangdai

2024 Olympics: Gymnast Carlos-a lawmman dangdai
Olympics a medal lak hi infiammi te thil chak leh tum ber pakhat a ni a, medal an dawn avangin an ram sorkar bakah company leh mimal tam takin thilpek leh lawmman thahnem tak an pe thin. Philippines gymnast Carlos Yulo pawh hi a hausa haw lawih dawn a, a lawmman dawn tur zingah thil danglam tak a tel a, a dam chhunga a thlawna colonoscopy tih theihna tur leh a dam chhunga ramen ei tur a thlawna dawn tur te pawh a nei!
Carlos Yulo hian 2024 Paris Olympics-ah August ni 3 khan floor final-ah gold medal a dawng a, Philippines mipa infiammi zinga Olympic gold medal dawng hmasa ber niin record a siam. Mahse, chu mai a la ni lo, a tukah vault final-ah gold medal a dawng leh a, Philippines mipui zinga Olympic champion tum hnih ni thei hmasa ber niin, record dang a siam leh ta a ni.
Yulo lawmman dawn tur hi hausak pui lawih tham a ni dawn a, Filipino real estate company Megaworld chuan an ram infiammi zinga gold medal dawng te chu in sak sa, bedroom pahnih awmna, dollar 4,14,000 (Rs 3,47,52,000 vel) man pek theuh an lo tiam tawh a, Filipino House of Representatives atangin a pawisa faiin dollar 1,03,511 (Rs 86,88,000) a dawng dawn a, Philippines sorkarin an ram infiammi gold medal dawng te chu dollar 1,72,519 (Rs 1,44,81,684) pek a lo tiam tawh bawk a, gold medal pahnih a dawn avangin sorkar atanga a sum dawn tur hi a letin a pung dawn a ni.
Heng bakah hian gastroenterologist pakhat chuan Yulo hi a dam chhung zawng a inentir duh apiangin a thlawna en leh, colonoscopy a tih duh apianga a thlawna tihsak a intiam bawk. Colonoscopy chu ril enna a ni a, mawngkua atangin endoscopy tih a ka chhunga an rawlh luh ang chi hi rawlh lutin, ril an en thin. Hei bakah hian restaurant chain lamin a dam chhung chu a duh hun hunah a thlawna ramen (chow ti mai ila) an dawra ei an phal sak a, University of Mindanao-in a thlawna lehkhazir theihna kawng an hawn sak dawn bawk a ni.