2025 Australian Open: Hmeichhe lam an inthlifim zel

2025 Australian Open:
Hmeichhe lam an inthlifim zel
Pathiannia Australian Open fourth round khelh chhunzawmah a tumpui Russian tleirawl Mirra Andreeva laka 6-1, 6-2 hnehna awlsam changin hmeichhe singles champion lai leh top seed ni bawk Aryna Sabalenka chuan minute 62 lek chhungin quarter-final a lut a, Melbourne Park-ah match 18 chak zawn tling chiah a ni.
Tarlan tawh thin angin, kumin hian a title kawl lai a humhim leh thei a nih chuan Belarusian hi kum 26 liamta daih tawha Australian Open women’s title vawithum la zawn thei Martina Hingis hnu lama chuti ang ti leh thei hmasaber a ni ang.
14th seed Andreeva khan Rod Laver Arena tualzawla a hmachhawn world number one Sabalenka kha kawng engkimah a khan lo a, fourth-round match inbuktawk lo zet niin, nikum French Open quarter-final match-ah kha chuan Russian tleirawl khan chiang zetin Belarusian kha a barakhaih a, Melbourne lamah erawh Paris ang khan Andreeva a tal thei ta lo a ni.
Hnehna a chan zawh khelmuala an kawmnaah Belarus nula chuan, “Andreeva khelh hi a awlsam lo tlangpui zel a; a la naupang hle chungin heti kaua ropui hian tennis a khel thei der tawh a ni.
“Vawiina ka level pangngai ka pha leh hi ka hlim takzet a, tournament chhungin heti ang hlira ka khelh chhunzawm theih pawh ka beisei,” a ti.
Kum 26-a upa leh Grand Slam-a vawithum champion tawh ni bawk Sabalenka hian semi-final luh inchuh match pakhatah Russian dang Anastasia Pavlyuchenkova a hmachhawn dawn a, Grand Slam tournament a khelh hnuhnung vawi 13-a a tum 11-na atan quarter-final a khel dawn a ni.
Nimin round of 16 inkhel dangah Pavlyuchenkova hian Croatia player Donna Vekic chu 7-6 (7-0) 6-0-in a paltlang ve bawk.
Bencic test paltlangtu Gauff
United States innghahna lian Coco Gauff chuan fourth round match dangah Switzerland player Belinda Bencic laka set khatna hloh zet chungin 5-7, 6-2, 6-1 hnehna a changlet a, tun season-ah match kaw chhung a chakzawn tling ta a ni.
Fanu a hrin hnua world ranking lama 294-na ni duai tawh Swiss Bencic hian major champion a hmachhawn tawh vawiriatah vawisarih chakin, Rod Laver Arena ni sensa rum al hnuaiah pawh first set latu zawk a ni leh a, Grand Slam champion a lo ngam laklawh tawh thin avangin American third seed Gauff lakah pawh hnehna a chang leh thei mai dawna ngaihna a piang hman a, mahse, kumin inkhel danga set vawikhat mah hloh lo 2023 US Open champion erlet a dang zo ta lo a ni.
Kum 27 mi Swiss a paltlang hnuah Gauff khan quarter-final lamah Spain player Paula Badosa a khel zui leh dawn a ni.
Kum 20-a upa Gauff chuan a tumpuiin set khatna a khelh that hle thu sawi chungin Tokyo Olympic gold medallist Bencic hmachhawn hautakzia hahipin a sawi zui a, chu tah, inkhel khaikhawmin a khelh dana a lungawi thu leh second set-a a nawr nat tak zawk thu a sawi a, set thumnaah phei chuan a khelh that theih dan ang bera a khelh chhuah theih tawh thu a tarlang tel.
Gauff-te inkhelh laia court chhung lum zawng kha lum zawng tehnaah degree 34 tehreng niin, nimin inkhel zinga a lum ber hun lai niin, inkhelh harsa tham khawpa boruak lum hnuaiah hnehna changin, a zawna match 11 a chak tlinna chiah a ni.
American Gauff tum leh tur Spaniard 11th seed Paula Badosa chuan last 16 match dangah 6-1 7-6-in Serbia mi Olga Danilovic a hneh ve bawk a, Gauff leh Badosa inkhela chak zawk zawk hian semi-final lamah Sabalenka an su zui dawn a ni.
Raducanu veltu Swiatek
Melbourne Park-a 2025 Australian Open khelh ni sarihna Inrinni khan Polish number one Iga Swiatek chuan third round match pakhatah 6-1, 6-0-in Great Britain innghahna Emma Raducanu a sawp a, fourth round lamah 6-4 6-3 6-3-a Jaqueline Cristian hnehtu Eva Lys a su zui leh.
Second seed Swiatek hian Raducanu backhand a bitum na deuh bik a, Rod Laver Arena-ah minute 70 lek chhungin hnehna awlsam a sualchhuak a, a tum ngana atan Melbourne-ah last 16 a lut.
Kum 23 mi chuan Briton laka hnehna a chan hnuah nual ti taka a inkhelh thu leh a zirna ang chiaha a khelh chhuah theih thu a sawi a, inrintawkna thuk tak nena a khelh thu a tarlang tel.
Raducanu nena tum li an intum tawhah Pole hi a la chak fai vek a, fourth round a luhna kawngah kumin hian set hloh a la nei lo tluang zel.
Kum 2021 Flushing Meadows-a champion hnua hliam leh natna hrang hrangin a tlakbuak Raducanu hian US Open-ah bak major title a la hlawhchhuak zo lo tluang zel a, WTA ranking lamah pawh world number 61 niin, five-times Grand Slam champion lakah a ngai te bawkin a tlawm zawkah a tang zui leh ta a ni!
Inrinnia an inkhelh lai boruak kha 31 degrees Celsius (88F) vel niin, anni pawh hian ni sena hnuaiah match an khel a, mahse, player pahnih an inkhan loh em avangin ni sa hnuaiah an awm rei ta lo hlauh zawk a ni!
6-3 6-4 -a Dayana Yastremska hnehin Elena Rybakina pawhin last 16 lut Swiatek hnung a zui ve bawk.
Russian-born Kazakhstani Rybakina hian nikum khan Melbourne Park-ah hian qualifier ni chungin semi-final a thleng a, kumin hian chu kalkawng bawk a chhui leh mekna kawngah Ukraine player a paltlang leh ta phawt a ni.
John Cain Arena-a a inkhel tir lamah sixth seed Rybakina kha a inhliam a, chuti chungin hnehna a chang zui ta tho a; inkhelh banah a dinhmun sawichhuakin, “Rei tak tak insaitawn kha ka tlin dawn lo tih ka hriat avangin ka nawr nat a ngai tih ka hria a; he game ka paltlang thei hi ka hlim takzet a ni.
“Ka hliam chungchangah hian ka physio ka hmu ang a, ani’n magic a lo hmang ang,” tiin a dinhmun a eng lam zawngin a thlir.
Inrinni vek khan fourth seed Jasmine Paolini lakah Melbourne-a tum hnih lai quarter-finalist lo ni ve tawh Elina Svitolina chuan 2-6 6-4 6-0 hnehna changin, Italian fourth seed laka a chak theihna kawngah Ukrainian chuan a hmaa a pasal Gael Monfils-a khelh dan chuan phurna leh thathona a siamsak niin a sawi.
Paolini a hnehna khelmual Margaret Court Arena-ah vek khan French mihang Monfils chuan men’s fourth seed Taylor Fritz lakah hnehna changin, a hnua khelmual lut a nupui pawhin nikum French Open leh Wimbledon finalist Paolini lakah hnehna a sualchhuak.
Last 16 lama Svitolina tum leh tur Russian Veronika Kudermetova chuan inkhel dangah 6-4 6-2-in Brazil player Beatriz Haddad Maia a hneh ve bawk.