2025 GMA Dove Awards nominations-ah Brandon Lake a langsar ber
Gospel music tana chawimawina sang 2025 GMA Dove Awards nomination an puang ta a, Brandon Lake, CeCe Winans, Forrest Frank, Josiah Queen, Lauren Daigle leh Phil Wickham te chu award ngihhlut artist of the year-ah nominate an ni.
Brandon Lake hi kumin nomination-a langsar ber niin, nomination pakua a nei a, chung zingah chuan artist of the year, song of the year leh pop/contemporary recorded song of the year te pawh a tel. Lake hian a album thar ber King of Hearts a hlawhtlinpui viau a, Billboard 200 (albums) chart-ah pawh top 10 kai thei kha a ni.
Kumin hian GMA Dove Awards hi rei tak a semna hmun atana an lo hman tawh Lipscomb University, Nashville atangin Bridgestone Arena, Nashville-ah an sawn a, award hi October ni 7 a sem tur a ni. Kumin nomination-ah hian hming thar a tam khawp mai a, artist 40 chuang chu he award nomination-a an lan vawi khatna niin, chung zingah chuan Abbie Gamboa, Down East Boys leh Nick Day te pawh an tel.
Kumin award show theme atan “Creation Sings” tih an hmang a, singer-songwriter Tauren Wells chu award ceremony host a ni dawn a, ani hian award show host tura a ko leh chu a phur thu sawiin, “Worship buatsaih a, lo nunpui tawh leh lo kaihruai tawh thin ka nihnaah, kan rimawi te hi hla ropui zawk daih hlimthla a ni chauh zawk…Pathianin a tawngka maia khawvel a din tirh atanga intan taw a ni. Tuipui fawn inchhawk ri atanga mihring ten kan fakna tlengin, thilsiam tinreng ten A ropui zia an puang a ni. Chatuan rimawi tana an aw thawh belhtu te chawimawina hun tur hi ka nghakhlel tak zet e,” a ti.